Deputeti i Partisë Demokratike, Ervin Salianji, ka zhvilluar një takim në Kavajë ku kritikoi ashpër qeverinë për performancën e saj gjatë tre mandateve të fundit. Salianji u shpreh se gjithçka që kjo qeveri ka prodhuar ka qenë korrupsioni, varfëria dhe shpopullimi i vendit.
**”Kafshatë që s’kapërdihet është qeveria! Braktisje, shkretim, padrejtësi, korrupsion, varfëri, pabarazi, vuajtje, shpopullim, mungesë mundësish e shërbimesh, kriminalitet… gjithçka ka prodhuar kjo qeveri në 3 mandate është lufta ndaj qytetarëve dhe shërbimi ndaj banditëve,”** tha Salianji në postimin e tij në rrjetet sociale.
Ai bëri thirrje qytetarëve që të bashkohen në protestën e planifikuar më 11 korrik, duke theksuar se ka ardhur koha për të ndalur këtë qeverisje dhe për të bërë ndryshime të mëdha. **”Ka ardhur koha ta ndalim, të gjithë bashkë në 11 Korrik ora 20:00!”** u shpreh ai.
Salianji nënvizoi se kjo qeveri ka shkaktuar vuajtje dhe pabarazi të mëdha në shoqëri, duke i ftuar qytetarët të ngrihen për të kërkuar drejtësi dhe mundësi të barabarta për të gjithë.
Kjo deklaratë vjen në një kohë kur tensionet politike janë në rritje dhe protestat e opozitës pritet të intensifikohen. Opozita ka bërë thirrje për mobilizim të gjerë për të kundërshtuar atë që ata e shohin si një qeverisje të korruptuar dhe të paaftë.
