Kreu i qeverisë Edi Rama mbrëmjen e sotme ka qenë i ftuar në emisionin “Pressing”, ku ka folur rreth dy ish-ministrave të Brendshëm, Saimir Tahiri dhe Fatmir Xhafaj.
Kryeministri është distancuar nga skandalet ku janë përfshirë emrat e dy ish-ministrave, duke thënë se është ai që e përzgjedh kabinetin qeveritar, por secili ecën me këmbët e tij dhe është përgjegjës për veprimet e tij.
Edhe një herë Rama ka shfajësuar Tahiri, teksa u shpreh se në një kohë kur Anti-mafia italiane as që e kishte marrë pjesë të grupit, në vendin tonë kërkohej lincimi i tij.
Po ashtu, kryeministri nuk e përjashtoi mundësinë e rikthimit të Tahirit në mazhorancë, pasi i pyetur rreth arsyes pse nuk e kthen atë në qeveri, u shpreh se procesi gjyqësor s’ka mbaruar ende.
Kështu, ai ka lënë të kuptohet se pas përfundimit të procesit gjyqësor, Tahiri mund të rikthehet në Partinë Socialiste.
Sa i përket Xhafajt, Rama u shpreh se ka dhënë dorëheqjen dhe nuk është hequr, pasi ai nuk mund të mbajë përgjegjësi për të vëllanë.
PJESË NGA EMISIONI:
Edi Rama: Ministrat janë si anëtarët e bandave. Ministrat zgjidhen nga unë dhe varen nga këmbët e tyre, përgjigjen ata.
PYETJE: Tahiri nuk ishte ministër i zakonshëm.
Edi Rama: Patjetër, ashtu ishte. Tahiri është në një proces. U lincua për shkak të përgjimeve të Policisë italiane. Anti-mafia italiane as që e kishte marrë pjesë të grupit, ndërsa këtu kërkohej lincimi i tij.
PYETJE: Pse e shkarkuat Xhafajn meqë e kishte fajin vëllai?
Edi Rama: Ai dha dorëheqjen, merreni në intervistë dhe pyeteni. Vëllai im është në jetën e vetë dhe po shkeli në dërrasën e kalbur, do përgjigjem unë? Jo mo të përgjigjet vetë, ç’punë kam unë?
PYETJE: Pse nuk e ktheni Tahirin në qeveri?
Edi Rama: S’ka mbaruar procesi gjyqësor.
Kujtojmë se dy ish-ministrat, Saimir Tahiri dhe Agron Xhafaj janë përfshirë, përkatësisht, në dosjen e Habilajve dhe “Babales”.
Tahiri ka qenë ministër nga viti 2013 deri në 2017, kurse Xhafaj nga muaji mars i viti 2017 deri në tetor të 2018.
