Në Mat, aty ku për vite me radhë mungojnë investimet jetike për komunitetin dhe banorët përballen çdo ditë me varfëri dhe braktisje, po shpaloset një tjetër skenar i njohur: investime të minutës së fundit, të bëra thjesht për të rrëmbyer vota.
Ish-kryebashkiaku i Matit, Agron Malaj, sot kandidat për deputet nën siglën e Partisë Socialiste, është autor i këtij plani elektoral. Pasi la postin e kryetarit të bashkisë, Malaj nisi ndërtimin e një rruge të re që, rastësisht, përfundon pikërisht tek hidrocentrali i ndërtuar nga vëllai i tij.
Një skemë e pastër favorizimi, që vjen në kontrast të plotë me realitetin e dhimbshëm të banorëve të fshatit Frankth, të cilët prej vitesh kanë mbetur pa rrugë, duke detyruar fëmijët të ecin për gjashtë orë çdo ditë për të ndjekur mësimet në Burrel. Një komunitet i lënë pas dore, ndërsa milionat e bashkisë derdheshin në xhepa privatësh.
Lista e shkeljeve të Agron Malajt është e gjatë dhe e dokumentuar:
Korrupsion në tendera: Bashkia Mat, nën drejtimin e tij, zhvilloi tenderë të dyshimtë ku kompani të lidhura me interesat e tij dhe të vëllait fituan kontrata të majme. Tenderi për asfaltimin e rrugëve, me vlerë 330 milionë lekë, i dha favore bashkimit të operatorëve “ZDRAVA” dhe “SALILLARI”, ndërkohë që alternativa më e lirë u përjashtua për arsye formale.
Fushatë me asfalt: Investimet në rrugë dhe infrastrukturë u përqendruan pikërisht në prag të fushatës zgjedhore, duke shkelur frymën e barazisë së garës dhe duke përdorur fondet publike për përfitime politike.
Mashtrim me investime: Miliona lekë u shpenzuan për tendera si 13 milionë për sisteme vaditjeje në dimër, apo 360 milionë lekë për lyerjen e një pallati kulture, duke u kategorizuar si tendera me risk të lartë korrupsioni nga Open Data Albania.
Përfitime personale: Agron Malaj dhe vëllai i tij kanë ndërtuar dy hidrocentrale në Madhesh, pavarësisht protestave të komunitetit, duke përdorur pushtetin lokal për interesa private.
Pasuri e pajustifikuar: Nga malet e Matit deri në bregdetin e Dhërmiut, pasuria e Malajt është zgjeruar në mënyrë të pashpjegueshme, përfshirë ndërtimin e hotelit luksoz “La Brisa”.
Censurë dhe presion mbi mediat: Në prag të zgjedhjeve, Malaj ka orkestruar tenderë për kontrollin e mediave lokale, duke synuar të shuajë çdo zë kritik ndaj tij.
Ndërsa Agron Malaj ndërton rrugë për të lehtësuar hyrjen tek bizneset e familjes së tij, banorët e Matit vijojnë të vuajnë mungesën e rrugëve bazike, të ujësjellësve dhe të infrastrukturës shkollore. Investimet elektorale që shfaqen tani janë thjesht fasada, një përpjekje e dëshpëruar për të larë mëkatet e një administrimi të dështuar.
Një ish-gardist që duhej të përgjigjej para drejtësisë për rolin e tij në 21 janar, sot rikthehet për të kërkuar votat e qytetarëve që i ka tradhtuar dhe lënë në harresë për vite me radhë.
