Bilanci i viktimave nga aksidenti në qytetin e Mannheim-it, Gjermani, është rënduar.
Sipas medias gjermane Bild, përplasja e një automjeti me një turmë njerëzish në tregun e karnavaleve ka shkaktuar dy viktima dhe ka lënë të plagosur 25 persona të tjerë.
Policia ka arrestuar një të dyshuar në lidhje me ngjarjen dhe po vijojnë hetimet për të sqaruar rrethanat dhe shkaqet e incidentit.
“Gjatë operacionit të kërkimit, një i dyshuar u identifikua dhe u arrestua,” njoftuan autoritetet, por ende nuk kanë dhënë detaje mbi identitetin e tij apo nëse ngjarja po trajtohet si një sulm i qëllimshëm.
Incidenti ndodhi në sheshin qendror të Mannheim-it, gjatë një parade karnavalesh që tërheq mijëra vizitorë në qytete të ndryshme të Gjermanisë. Për shkak të hetimeve në vazhdim, policia u ka bërë thirrje qytetarëve të shmangin qendrën e qytetit.
Mannheim, me një popullsi prej rreth 320,000 banorësh, ndodhet në veri të landit Baden-Württemberg, pranë kufirit me Hessen dhe Rheinland-Pfalz.
Ngjarja vjen pas disa incidenteve të ngjashme në Gjermani muajt e fundit. Më 13 shkurt, një person sulmoi me makinë një demonstratë në Mynih, duke plagosur disa persona, ndërsa në dhjetor, një tjetër sulm në tregun e Krishtlindjeve në Magdeburg la gjashtë të vdekur dhe rreth 300 të plagosur.
Autoritetet po shqyrtojnë të gjitha pistat për të kuptuar nëse incidenti në Mannheim ka lidhje me këto ngjarje apo është një rast i izoluar.
