Komisioni i Ekonomisë ka rrëzuar ditën e sotme kandidaturën e Petraq Milos, për kreun e Kontrollit të Lartë të Shtetit.
Milo është kandidatura e tretë e propozuar nga presidenti Ilir Meta, pas Bahri Shaqirit dhe Vitore Tushës.
Pasi pa CV-në e tij, deputetja socialiste, Evis Kushi, i ka kërkuar përgjigje Milos për tre pika, shkruan “Balkanweb”.
Sipas saj, në CV mungojnë të dhënat për detyrën që ka mbajtur në Bankën e Shqipërisë në kundërshtim me ligjin, pasi ka qenë pjesë e Këshillit Kombëtar të PD-së.
Më tej ajo kërkoi gjithashtu shpjegime, për arsyet e dorëheqjes nga posti në Bankën e Shqipërisë.
Paqartësi ka pasur edhe për detyrën që Milo ka mbajtur nga viti 1988-1991, periudhë për të cilën mungojnë të dhënat në CV, sipas Kushit.
Ndërkohë Milo nga ana tjetër tha se sipas ligjit, në CV duhet të jenë 10 vitet e fundit, ndërsa ai ka dhënë informacione për 20, duke mohuar edhe dorëheqjen nga Banka e Shqipërisë.
Gjithashtu ai shtoi, se nuk ka pasur asnjëherë qëndrim politik gjatë punës së tij.
Konstatimet e Kuvendit sipas këshilltarit të Presidentit, Bledar Dervishi, nuk janë të mbështetura në ligj.
