Polonia ka njoftuar rrëzimin e disa dronëve rusë që shkelën hapësirën e saj ajrore gjatë sulmeve të fundit kundër Ukrainës, duke rritur tensionet në kufirin lindor të NATO-s.
Kryeministri Donald Tusk deklaroi se Varshava do të kërkojë aktivizimin e Nenit 4 të Aleancës, i cili parashikon konsultime mes vendeve anëtare në rast kërcënimesh ndaj sigurisë së ndonjë shteti. Ushtria polake raportoi se 19 dronë rusë kaluan kufirin ajror, prej të cilëve 3 deri në 4 u neutralizuan nga mbrojtja ajrore.
Autoritetet polake konfirmuan se një shtëpi në rajonin e Lublinit u godit nga fragmentet e një droni, por fatmirësisht nuk pati viktima. Banorët janë paralajmëruar të qëndrojnë në shtëpi, sidomos në zonat më të ekspozuara ndaj rrezikut si Podlaskie dhe Mazouieckie.
Sipas raportimeve, Ukraina u përball me mbi 400 dronë dhe 40 raketa gjatë sulmit, ndërsa disa prej tyre mund të kishin si objektiv territorin polak. Presidenti ukrainas Volodymyr Zelensky deklaroi se rreth tetë dronë ishin të destinuar për Poloninë, duke theksuar se situata mbetet tepër e rrezikshme.
Ky incident pritet të diskutohet në nivel të lartë mes vendeve anëtare të NATO-s, në kuadër të shqyrtimit të hapave të mëtejshëm për sigurinë e aleancës.
