Kryeministri i Kosovës, Albin Kurti është kërcënuar me jetë, sipas raportimit të Radio-Televizionit publik të Kosovës. Institucionet e sigurisë, sipas tyre, kanë konfirmuar se ka pasur përpjekje nga Serbia për të vrarë Kurtin, ndërsa ai qëndronte në Shkup.
Ky lajm ka dalë pas mbledhjes së Këshillit të Sigurimit të OKB-së, dhe raportohet se të gjitha masat e nevojshme janë marrë në bashkëpunim me Maqedoninë e Veriut për të garantuar sigurinë e Kurtit, i cili ishte në Shkup mbrëmjen e kaluar.
Televizioni publik ka thënë se kërcënimi për jetën e Kurtit është vlerësuar si serioz, me bazë në informacione nga disa burime.
Kurti gjithashtu ka reaguar përmes rrjeteve sociale në lidhje me këtë lajm.
“Unë kam mësuar që ka shumë kërcënime nga individë e struktura të cilët kanë rrënjët në Beograd, por unë sapo erdha nga Shkupi këtu. Nuk jam ndier i rrezikuar, por kam parë se kishte shumë forca policore që u përkujdesën për mbledhjen e mbajtur në Shkup”, tha ai.
