Policia ka vënë në pranga administratorin dhe inxhinierin e firmës së ndërtimit, të një pallati në Durrës.
Mbrëmjen e djeshme një 62-vjeçar, i cili ishte edhe roja i këtij objekti u rrëzua nga kati i dytë duke humbur jetën.
Të arrestuarit rrezikojnë deri në 10 vite burg.
Mbi ta rëndojnë veprat penale “Shkelje e rregullave të mbrojtjes në punë”.
Materialet proceduriale i kaluan Prokurorisë së Durrësit për veprime të mëtejshme.
Njoftimi i policisë:
Durrës
Vihet në pranga për shkelje të rregullave në punë, administratori dhe inxhinieri i firmës ndërtuese të një pallati, ku në orët e mbrëmjes së djeshme humbi jetën një 62-vjeçar, rojë i këtij objekti.
Policia e Durrësit, menjëherë pas njoftimit të marrë se një shtetas kishte rënë aksidentalisht nga kati i dytë dhe për pasojë humbi jetën, menjëherë ka kryer gjithë veprimet hetimore, në bashkëpunim me prokurorinë dhe në përfundim të veprimeve, specialistët për Hetimin e Krimit bënë arrestimin në flagrancë të shtetasve:
- J., 47 vjeç, banues në Durrës, administratori i firmës dhe E. R., 43 vjeç, banues në Durrës, inxhinier i firmës që ndërton objektin.
Këta shtetas akuzohen për shkelje të rregullave në punë, pasi më datë 28.01.2020, rreth orës 23:18, në një objekt në ndërtim, humbi jetën aksidentalisht shtetasi Th. R., 62 vjeç, i punësuar si rojë pranë këtij objekti.
Këta shtetas rrezikojnë të dënohen deri në 10 vjet burg.
Materialet i kaluan Prokurorisë së Rrethit Gjyqësor Durrës, për veprën penale “Shkelja e rregullave të mbrojtjes në punë”.
