Rituali i Dollisë prej sot njihet si Vlerë Kombëtare e Trashëgimisë sonë, pas vendimit të marrë në mbledhjen e Këshillit Kombëtar të Trashëgimisë Kulturore Jomateriale.
Dollia përbën një zakon tradicional familjar dhe social që thekson rëndësinë e bashkimit të njerëzve në raste të ndryshme. Ky ritual reflekton mikpritjen e thellë shqiptare, duke krijuar një atmosferë ngrohtësie dhe bujarie ndaj mysafirëve.
Një nga elementët kryesorë të Dollisë është roli i dollibashit, i cili zë vendin e nderit në krye të tryezës, duke u përballë pritësit të Dollisë. Marrëdhënia mes tyre karakterizohet nga urimet e ndërsjella dhe respekti i sinqertë, që shprehet para të gjithë të ftuarve.
Me kalimin e kohës, Dollia është zhvilluar në një kod moral të thellë, i cili përfshin dhe lidhet me shumë aspekte të trashëgimisë shpirtërore shqiptare, duke ruajtur kështu vlerat dhe traditat e komunitetit tonë.
