Kryeministri Edi Rama së bashku me ministrin për Rindërtimin, Arben Ahmetaj dhe ministren e Kulturës, Elva Margariti, prezantuan modelet e reja që do të kenë banesat, që do të ndërtohen pas tërmetit.
Rama tha se fillimisht do të sistemohen në shtëpi familjet që jetojnë në çadra dhe nuk duan të shkëputen nga tokat e tyre.
“Të parët që do kenë një strehë do jenë ata që kanë më shumë se të tjerët domosdoshmërinë për të hyrë në një shtëpi të re. Synohet që brenda këtij viti të kemi sistemuar disa mijëra familje. Shtëpitë e para do të jenë për familjet në çadra që nuk duan të shkëputen nga tokat e tyre”, u shpreh kreu i qeverisë.
Më tej shefi i qeverisë shtoi, se rindërtimi do të fillojë nga Thumana, e cila ishte një nga zonat më të prekura.
Ministrja Margariti ndërkohë prezantoi elementët përbërës të shtëpive të reja.
“Do të ketë tre lloje banesash; banesa njëkatëshe, teknologji modulare, kopsht bujqësor, oborr dhe verandë. Elementët përbërës të shtëpive; bazamenti, struktura, muret dhe izolimi, çatia. I jemi bazuar rezistencës së tërmetit 9 ballë”, tha Margariti.
Ndërsa ministri për Rindërtimin, Arben Ahmetaj, tha se grantet për qytetarët do të jepen në varësi të dëmtimit të banesave.
