Sot përfundon gjendja e fatkeqësisë natyrore, e vendosur për shkak të pandemisë së koronavirusit.
Në një lidhje “live” nga rrjeti social “Facebook, ministrja e Shëndetësisë, Ogerta Manastirliu theksoi se masat e marra do të vijojnë të mbeten në fuqi, kurse transporti publik qytetas dhe ndërqytetas do hapet pas tre muajsh bllokimi për shkak të pandemisë Covid-19.
“Komiteti Teknik i Ekspertëve ka vendosur hapjen e transportit publik, por vetëm nën protokolle strikte, tashmë të miratuara, ku vendosja e maskës qoftë nga ata që shërbejnë apo nga qytetarët që e përdorin transportin publik, do të jetë e domosdoshme dhe nuk do të tolerohet asnjë thyerje e këtij rregulli”, tha Manastirliu.
E në rast se do të ketë rritje të rasteve të të infektuarve më Covid-19, ministrja Manastirliu është shprehur se do të hapët edhe spitali COVID 4.
“Me plotësimin e kapaciteteve në Spitalin Infektiv, po përgatitemi për hapjen e ish-Kirurgjive në QSUT për të përballuar fluksin në rritje dhe jemi duke rekrutuar stafin mjekësor dhe infermieror që do të shërbejë në këtë spital.
Paralelisht nëse do të kemi shtim të rasteve në terapi intensive do të rihapim Spitalin COVID 2, pra ish-Sanatoriumin, dhe në skenarin tjetër, në rast se shifrat kapërcejnë këto kapacitete do të kalohet tek spitali karantinë COVID4 në aksin Tiranë-Durrës.
Jemi duke u përgatitur për disa skenarë sipas planit të veprimit të miratuar nga Komiteti Teknik i Ekspertëve”, u shprej më tej në lidhjen “live” Manastirliu.
