Konsumi i drogave të forta po njeh rritje të vazhdueshme në mbarë Evropën, duke sjellë pasoja të theksuara sociale dhe shtim të aktivitetit kriminal të lidhur me trafikun e narkotikëve.
Kokaina, një nga substancat më të përhapura, shpesh transportohet e maskuar në kontenierë me mallra të ligjshme si plehra bujqësore, kafe apo fruta, veçanërisht banane, për të hyrë në portet kryesore të kontinentit si Anversa, Roterdami apo Bilbao.
Në këtë rrjet të gjerë nuk mungon as Porti i Durrësit në Shqipëri, i cili shërben si një nga pikat hyrëse drejt tregut europian për trafikantët.
Korrespondenti, Louis Seiller, ndodhet pikërisht përballë hyrjes kryesore të këtij porti strategjik në një vend me rreth 2.5 milionë banorë, i cili po përballet gjithnjë e më shumë me sfidën e përfshirjes në itineraret e trafikimit ndërkombëtar të kokainës.
Nga Louis Seiller, Radio France Internationale
Rreth rrethrrotullimit që shënon hyrjen e portit, ka disa dyqane të vogla dhe kafene të mbushura me njerëz që punojnë aty pranë. Aty takoj Agronin, rreth të gjashtëdhjetave. Ky pensionist nga Durrësi kalon çdo ditë para kontejnerëve. Bananet vijnë nga Ekuadori. Hyjnë në Shqipëri dhe më pas nisen drejt Kosovës dhe më tej, në Evropë. Si kudo, autoritetet luftojnë kundër trafikut të drogës. Në port, ata monitorojnë me kamera, skanerë dhe pajisje të tjera. Dhe kur gjejnë drogë, bëjnë sekuestrime. Por kanë pak frikë, sepse nuk është e lehtë të luftosh kundër trafikantëve. Duhet shumë guxim.
Pasi mbërrin në portin e Durrësit, kokaina zakonisht ngarkohet sërish në tragete për në Itali, përtej detit Adriatik. Por shpesh transportohet edhe me rrugë drejt Kosovës, Serbisë dhe autostradave që të çojnë në Evropën Qendrore.
Fatjona Mejdini është koordinatore rajonale e Iniciativës Globale kundër Krimit të Organizuar Transnacional. Sipas saj, rrjetet ballkanike janë bërë aktorë kryesorë në trafikun ndërkombëtar të kokainës. Këto grupe përpiqen të dërgojnë kokainë në portet e Ballkanit, si Durrësi. Por sipas studimeve të tyre, sasitë janë më të vogla se ato që shkojnë në portet e Evropës Perëndimore, sepse atje është shumë më vështirë të zbulohet droga për shkak të volumit të madh të mallrave dhe afërsisë me tregun e konsumatorëve të kokainës.
Në Beograd dhe Tiranë, ndërtimet e godinave luksoze janë shtuar vitet e fundit. Kulla moderne si në Dubai, ndonëse Shqipëria deri vonë ishte një nga ekonomitë më të varfra në Evropë. Për shumë shqiptarë, nuk ka dyshim që këto projekte financohen nga paraja e kokainës.
Ish-ministri i ekonomisë, Zef Preçi, thotë se shumë prej këtyre kullave ndërtohen nga kompani me kapital fillestar shumë të ulët, disa qindra mijëra euro, ndërkohë që investimet shkojnë në qindra milionë. Pas këtyre ndërtimeve, qëndrojnë “peshq të mëdhenj” që pastrojnë paratë e trafikut të drogës, veçanërisht kokainës që vjen nga Amerika Latine.
Të luftosh më shumë kundër krimit të organizuar është një nga kushtet që i është vendosur Shqipërisë për t’u anëtarësuar në BE. Në vitin 2021, rreth dy tonë e gjysmë kokainë u sekuestruan në Shqipëri, Kosovë dhe Mal të Zi.
