Sot përcillet në banesën e fundit regjisori i njohur shqiptar Pirro Milkani, i cili ndërroi jetë mbrëmjen e së shtunës.
Familja njofton se ceremonia e varrimit do të bëhet sot, më 25 maj, në varrezat e Sharrës në Tiranë.
Nisja do të bëhet në orën 13:00 nga agjencia funerale “Alba 2000”, në rrugën e Durrësit, pranë ish-ambasadës Jugosllave.
Për ngushëllime, pritjet do të mbahen më 27, 28 dhe 29 maj, në të njëjtën agjenci funerale, gjatë orarit 10:00-13:00 dhe 17:00-20:00.
Pirro Milkani lindi më 7 nëntor 1932 në Korçë dhe u diplomua në Akademinë e Arteve në Pragë, një prej shkollave më të njohura të kinemasë në Evropën Lindore.
Pas kthimit në Shqipëri, ai u bë një nga themeluesit e Kinostudios “Shqipëria e Re” dhe një nga pionierët e kinematografisë shqiptare.
Gjatë karrierës së tij, realizoi dhe kontribuoi në mbi 30 filma artistikë dhe dokumentarë.
Ndër veprat më të njohura janë “Njeriu me top”, “Ngadhënjim mbi vdekjen”, “Unë e dua Erën” dhe “Historiani dhe kameleoni”. Stili i tij i realizmit trajtonte temat sociale, patriotike dhe njerëzore përmes një gjuhe filmike të veçantë.
Përveçse regjisor, Milkani ka qenë pedagog dhe drejtues i institucioneve kulturore, duke ndihmuar në formimin e brezave të rinj të kineastëve shqiptarë. Ai ka mbajtur edhe poste diplomatike, duke shërbyer si atashe kulturor në Gjermani.
