Ka shkuar në dy numri i viktimave nga koronavirusi në vendin tonë.
Ministria e Shëndetësisë bën me dije, se ka ndërruar jetë 66-vjeçari nga Lushnja, i cili ndodhet te Infektivi.
Në njoftim thuhet se ai vuante nga sëmundje të tjera si insuficenca kardiake, edemë pulmonarë dhe insuficencë renale.
“Ndërron jetë në spitalin infektiv pacienti 66-vjeçar, kishte komplikacione të rënda Mëngjesin e sotëm ndërroi jetë pacienti i shtruar në spitalin Infektiv, i konfirmuar me COVID-19, i cili ishte në gjendje të rëndë, në respirim të drejtuar në reanimacion.
66-vjeçari nga Lushnja prej disa ditësh ishte i shtruar në shërbimin Infektiv, në gjendje të rëndë. Pacienti vuante nga disa sëmundje shoqëruese: insuficenca kardiake, edemë pulmonarë dhe insuficencë renale.”, njoftohet nga ministria.
Kujtojmë këtu se viktima e parë ishte një e moshuar e cila ndërroi jetë në spitalin e Durrësit disa ditë më parë.
Ajo ishte kthyer nga Italia më 1 mars dhe ua kishte mbajtur të fshehtë doktorëve këtë fakt.
Ndërkohë numri i të prekurve ditën e djeshme arriti në 55.
Nga këto 25 ndodhen në reapartin e Infektivit, ndërsa pjesa tjetër të karantinuar në shtëpi.
Për të parandaluar përhapjen e koronavirusit, qeveria ka ndërmarrë një sërë masash, duke ndaluar qarkullimin e makinave përtej orareve të përcaktuara.
Gjithashtu pas orës 18:00 ndalohet edhe lëvizja e këmbësorëve.
Më herë janë mbyllur shkollat, lokale, ndërsa për kompaninë që nuk mund të ndërpresin punën, Rama ka paralajmëruar gjoba, nëse nuk respektojnë masat ndaj COVID-19.
Prej ditësh në rrugë ndodhet policia dhe ushtria, të cilët po mbikëqyrin zbatimin e urdhërave të kryeministrit, si dhe po kontrollojnë personat e ardhur nga Italia, nëse janë duke e zbatuar rregullin e vetëkarantinimit.
