Ditën e sotme kanë nisur gërmimet për të gjetur eshtrat e të zhdukurve, gjatë komunizmit pranë burgut të Burrelit, në zonën që njihet si ‘Qershia’.
Gërmimet po udhëhiqen nga një grup i posaçëm, ndërkohë që kryetarja e Autoriteteve të Dosjeve të Sigurimit të Shtetit, Gentiana Sula ka ndarë detaje lidhur me aksionin e ndërmarrë.
Të afërmve që kanë humbur të dashurit, ajo u ka kërkuar durim dhe forcë, teksa shtoi se ky proces do jetë i gjatë. Nga pamjet e publikuara, duket një ekskavator që po gërmon dheun për të zbuluar nën tokë.
“Nën udhëheqjen e Task Forcës së posaçme, po gërmohet në oborrin e Burgut të Burrelit për të gjetur gjurmë të varreve të humbur në komunizëm. Do të jete një proces shumë i gjatë, dhe mbase i pasuksesshëm në disa raste, por i domosdoshëm dhe i përgjegjshëm. I uroj familjareve kurajë, durim dhe forcë për të vënë në vend dinjitetin njerëzor të të dashurve të tyre”, ka shkruar ajo.
Çfarë flitet për zonën e njohur si “Qershia”?
Një gropë gjigante pas burgut të Burrelit shërbeu si varr masiv. Në anë të gropës nuk kishte asnjë lloj bimësie, përveç një qershie që u bë simboli i vdekjes, ishte një kodrine me shkurrnajë, një baltë e kuqe dhe gjithë gurishtë (tregojnë të burgosurit politikë). Sipas llogaritjeve aproksimative, në Burgun e Burrelit që nga 1946-a deri në 1990-n kanë vdekur rreth 400 të burgosur. Një metodë e lashtë u përdor për të zhdukur gjurmët e krimit; për të zhdukur kufomat, punonjësit e burgut të Burrelit hidhnin mbi kufoma gëlqere, nga e cila shkriheshin.
/GazetaReforma.com/
