Reforma e burgjeve apo ndërhyrje në zgjedhje? Edi Rama, Nasip Naço dhe heshtja e SPAK-ut
“40 mijë euro për të dalë nga burgu” – deklaroi Nuredin Dumani në sallën e GJKKO-së. Atëherë ishte korrupsion i pastër. Sot, falë projektligjit të “burgjeve të hapura” të Nasip Naços, bëhet ligj. Një skemë që dikur kërkonte ryshfet, sot vjen me vulën e parlamentit. Koinçidencë që ndodh pikërisht 60 ditë para zgjedhjeve të 11 majit?
Koha e ndërhyrjes nuk është rastësi. Rama, mjeshtri i manipulimit elektoral, ka aktivizuar Naçon – ish-ministrin e Drejtësisë që ndërtoi rrjetët e tij në sistemin e burgjeve – për të lëshuar në qarkullim “mall të freskët” zgjedhor. Një skemë ku të burgosurit kthehen në vota të sigurta në këmbim të lirisë së pjesshme.
Pavarësisht bllokimit nga Komisioneri Zgjedhor Ilirjan Celibashi, Kuvendi vijon me këmbëngulje çështjen në Komisionin e Ankesave. Mesazhi është i qartë: kur Rama vendos, asnjë institucion nuk mund të bllokojë makinën e tij elektorale.
Vetë Dumani zbuloi skemën e plotë: “Kam paguar para që të dilja nga burgu, kisha avokat Alban Bengasin. Më ka ndihmuar dhëndri i vëllait të Nasipit që është mjek. Një mjek ligjor më bëri në gjendje të rëndë për të më liruar. M’i bëri letrat sikur vuaj nga zemra”. Çmimi? 40 mijë euro.
Ky “mjek ligjor” misterioz nuk është hetuar kurrë nga SPAK-u, pavarësisht se Dumani e lidh direkt me Naçon. Dyshimet i mbeten Bledar Xhemalit, emëruar nga Naço kur ishte ministër Drejtësie në 2014. I njëjti që u shkarkua nga ministri pasardhës Gazmend Bardhi për “akte ekspertimi të pavërteta” që liruan anëtarë të “Bandës së Durrësit”.
Bardhi e çoi Xhemalin në ndjekje penale, por ai u rikthye pas një vendimi të gjykatës dhe mbeti i paprekur edhe pas skandalit të zbuluar nga “Fiks Fare” për punonjësin e funeralit që vepronte si “drejtor nate” i Morgut të Tiranës.
Pse SPAK-u nuk heton lidhjen mes Naços, mjekut ligjor dhe formulës “40 mijë euro për liri”? Përgjigja bëhet e qartë kur shikon projektligjin e ri: ajo çka dikur ishte korrupsion i fshehtë, sot po bëhet politikë zyrtare.
Me projektligjin e Naços, mjafton firma e drejtorit të burgut – pa gjykatë, pa kontrolle. Çdo i dënuar me më pak se 2 vjet e 6 muaj dënim të mbetur, me një kontratë pune në dorë, mund të dalë ditën dhe të kthehet natën. E gjitha kjo me një firmë të vetme – pikërisht siç bëhej në kohën kur Naço drejtonte Ministrinë e Drejtësisë, por tani pa nevojën e 40 mijë eurove.
Ky nuk është gabim taktik, por strategji e përsëritur. Rama ka përdorur Naçon si instrument për të kapur sistemin e drejtësisë që kur ishte ministër, duke krijuar një rrjet besnikësh që sot shërbejnë për projektet e tij elektorale. Çdo reformë e Ramës ka një firmëtar të gatshëm në Kuvend, teksa vetë rri në hije.
Evolucioni i korrupsionit në Shqipëri ka arritur majat e sofistikimit. Ajo çka dikur bëhej nën tavolinë me ryshfete e diagnoza false, sot vjen me vulën e parlamentit. Është korrupsioni më i rrezikshëm – ai që shtetëzohet dhe bëhet i pamundur për t’u kundërshtuar.
Rasti i Naços simbolizon këtë transformim perfekt – i njëjti person që ndërtoi sistemin e korruptuar në Ministrinë e Drejtësisë, sot legjitimon atë sistem përmes parlamentit. Burgjet shndërrohen në reparte votimi, të burgosurit në elektorat të garantuar, dhe korrupsioni në reformë evropiane.
Grabitja elektorale e radhës po ndodh në dritë të diellit, duke përdorur ligjin si mburojë. Ndërsa SPAK-u, i cili duhet të hetonte lidhjen mes dëshmisë së Dumanit dhe projektligjit të Naços, ka zgjedhur rrugën më të sigurt – heshtjen.
/gazetareforma.com
