Kryeministri i Shqipërisë, Edi Rama, ka shkuar ditën e sotme në familjen e Arjan Salës, për të shprehur ngushëllime për ndarjen nga jeta të 32-vjeçarit. Familja Sala ka hapur dyert e mortit për ndarjen nga jeta të djalit të tyre dhe ende ka njerëz që shkojnë në banesë për t’i shprehur ngushëllimet.
Kryeministri Rama kërkoi pak ditë më parë që Sala të shpallej dëshmor i Atdheut, pasi trupi i tij u gjet në magazinën e qendrës tregtare “Casa Italia”, në tentativë për të shpëtuar të tjerët, mirëpo fatkeqësisht mbeti i bllokuar dhe më pas, ndërroi jetë.
Arjan Sala, 32-vjeç, ishte babai i një vajze të mitur dhe prej vitesh ishte punonjës sigurimi te “Casa Italia”. Trupi i tij u gjet 3 ditë pas zjarrit që ra tek ambienti ku ai punonte. Ekspertiza paraprake zbuloi se i riu ka qëndruar rreth 24 orë gjallë, por më pas nuk ia ka dalë dot të mbijetojë.
Trupi i tij u nxor me vonesë, ndërsa një përplasje e familjarëve dhe forcave zjarrfikëse, vuri nën presion autoritetet që të gjenin sa më herët trupin e Arjan Salës, një punëtori të zakonshëm që shpëtoi rreth 25 qytetarë dhe u vetësakrifikua në zjarrin masiv.
Arjan Sala u përcoll dje nga familjarët në banesën e fundit, ndërsa qeveria pritet ta shpallë Dëshmor të Atdheut me propozim të mijëra qytetarëve që u solidarizuan në rrjetet sociale.
