Rama vizitë zyrtare në Kosovë, por shkon për vizitë edhe në shtëpinë e ish-kreut të UÇK

Kryeministri i vendit Edi Rama është nisur drejt Kosovës, pasi të hënën do të zhvillohet mbledhja e radhës e 2 qeverive Shqipëri-Kosovë. Rama përveç takimit zyrtar, ka parashikuar edhe një vizitë të veçantë në fshatin Burojë të Skënderajt, ku banon familja e ish-presidentit të Kosovës, Hashim Thaçi. Ai është i shoqëruar me disa nga ministrat e kabinetit të tij dhe sipas agjendës së siguruar nga mediat, me delegacionin ku bëjnë pjesë, ministrja e Financave dhe Ekonomisë, Delina Ibrahimaj, ajo e Bujqësisë dhe Zhvillimit Rural, Frida Krifca, Mirela Kumbaro e Turizmit dhe Mjedisit, si edhe Elisa Spiropali, ministre për marrëdhëniet me parlamentin, Rama do të ndalet në orën 17:00 në Xërxë në fabrikën e miellit, “M&Sillosi” ku do të bisedojë me rreth 500 fermerë, ndërsa në 17:45, do ta vizitojë fabrikën e dyshekëve, “Comodita” në Gjakovë. Këto dy fabrika janë dy nga eksportueset më të mëdha kosovare. Pas vitit 2014, kjo është hera e dytë që Rama vizion sektore të korporatës. Pasi t’i kenë përfunduar këto vizita të dielën, Rama  do të vizitojë familjen e ish-presidentit, ish-kryeministrit dhe ish-udhëheqësit të Ushtrisë Çlirimtare të Kosovës, Hashim Thaçi. Ai këtë vizitë e realizon tek familja e Thaçit, vetëm disa ditë pasi e ka vizituar vetë atë në Hagë, ku po mbahet në paraburgim nën akuzat e caktuara nga Prokurori Special i Gjykatës Speciale.