Kryeministri grek Kyriakos Mitsotakis ka komentuar vizitën e pritshme të kryeministrit Edi Rama në Greqi më 12 maj, duke deklaruar se Rama nuk është i ftuar nga qeveria greke, por nuk mund të pengohet.
“Edi Rama vjen të bisedojë me bashkëkombasit e tij. Zgjedhja e Ramës për këtë vizitë më duket e panevojshme. Nuk e pengojmë dot, as e ndihmojmë,” tha Mitsotakis në një deklaratë për mediat greke.
Kjo vizitë e Ramës zhvillohet në një kohë kur Mitsotakis ka përfshirë kryebashkiakun e zgjedhur të Himarës, Fredi Beleri, në listën e 42 kandidatëve të Greqisë në garën për një mandat në Parlamentin Europian. Beleri u arrestua vitin e kaluar dhe u dënua nga Gjykata e Posaçme Kundër Korrupsionit dhe Krimit të Organizuar (GJKKO) me dy vite burg për blerje votash.
Greqia ka bërë thirrje të përsëritura për lirimin e Belerit, duke e konsideruar arrestimin e tij si të motivuar politikisht. Mitsotakis e bëri të qartë se rrugëtimi i Shqipërisë drejt BE-së do të pengohet nëse Beleri nuk lirohet.
“Pa lirimin e Fredi Belerit, Greqia do bëhet barrikadë në rrugën e Shqipërisë drejt integrimit europian,” tha Mitsotakis, duke theksuar se Greqia është e vendosur në mbrojtje të të drejtave të minoritetit grek në Shqipëri.
Arrestimi i Belerit ka përkeqësuar marrëdhëniet mes Shqipërisë dhe Greqisë, duke ngritur tensione të ndjeshme. Mitsotakis e ka cilësuar situatën si një test për demokracinë në Shqipëri dhe respektimin e të drejtave të njeriut, ndërsa Rama ka theksuar se sistemi i drejtësisë në vend është i pavarur.
Vizita e Ramës në Greqi do të zhvillohet në një klimë të tensionuar, me Mitsotakis që pritet të riafirmojë qëndrimin e tij për lirimin e Belerit dhe për të mbrojtur të drejtat e minoritetit grek në Shqipëri.
