Edi Rama vazhdon të mbushë arkën e shtetit me ndihma ekonomike që i vijnë nga jashtë. Pasi mori qindra miliona euro nga OBSH (Organizata Botërore e Shëndetësisë) gjatë këtij viti pandemik, Shqipërisë i kanë ardhur edhe 90 milionë euro të tjera.
Komisioni Europian në emër të BE-së, ka disbursuar sot 90 milionë euro për Shqipërinë, në kuadër të programit të ndihmës makro-financiare (MFA) lidhur me COVID-19.
Shqipëria është i teti vendi që merr një disbursim nga paketa emergjente e MFA-së prej 3 miliardë eurosh për dhjetë vende partnere të zgjerimit dhe fqinjësisë, që synon t’i ndihmojë ato të kufizojnë pasojat ekonomike të pandemisë së koronavirusit.
Ky disbursim do të kontribuojë në zbutjen e pasojave të rënda sociale dhe ekonomike të pandemisë së koronavirusit në Shqipëri. Transaksioni i sotëm pason miratimin e një Memorandumi të Mirëkuptimit me Shqipërinë, i cili përcakton kushtet e politikës që duhet të plotësohen për disbursimin e këstit të dytë prej 90 milion €.
Këto kushte të politikave lidhen veçanërisht me përmirësimin e qeverisjes ose rritjen e mbrojtjes sociale. Përmes kësaj ndihme, BE-ja shpreh solidaritetin e saj në krah të Shqipërisë dhe qytetarëve të saj në këto kohë të vështira.
Por ku po shkojnë këto para? A përdoren këto para për të blerë vaksina? Nëse po, atëherë pse Rama e përdor vaksinimin masiv si një arritje të tij dhe po e përdor për fushatë? Nëse jo, atëherë kuptohet qartë se ku po shkojnë këto shifra të majme…
