Kryeministri Edi Rama ka reaguar ndaj akuzave se ulja e çmimit të energjisë elektrike është një lëvizje elektorale, duke thënë se për të rëndësi ka vetëm interesi i qytetarëve dhe përfitimet që ata do të kenë.
“Nuk më intereson fare se çfarë thonë. Ajo që ka rëndësi është që mbi 1 milion konsumatorë do të paguajnë më pak për energjinë elektrike, falë një suksesi të arritur me shumë punë,” tha Rama.
Ai shtoi se vendimet e qeverisë janë rezultat i strategjisë së mirëfilltë për zhvillimin e vendit deri në vitin 2030 dhe se asnjë spekulim nuk e shqetëson.
“Thanë se edhe bonusi i pranverës për pensionistët është elektoral. Po, unë vetë jam elektoral sa herë dal nga shtëpia, sepse ajo që më intereson është që pensionistët të marrin një tjetër mbështetje,” vijoi kryeministri, duke nënvizuar se veprimet e qeverisë janë në funksion të përmirësimit të jetës së qytetarëve.
Sipas Ramës, qeveria mbetet e angazhuar në rrugën drejt “Shqipërisë 2030”, duke garantuar stabilitet dhe rritje për të gjithë qytetarët.
Megjithatë, vlen të rikujtojmë se tashmë në prag zgjedhjesh, ulja e çmimit të energjisë është vetëm një prej pikave në listën që kryeministri po u servir shqiptarëve si “dashamirësi”.
Po ashtu, bashkë me uljen e çmimit të energjisë, qeveria ka falur gjobat e Covid19, i ka dhënë bonus policëve, pensione të përndjekurve politikë dhe pasaporta diplomatike për gazetarët.
Mbetet për t’u parë sipas nevojës së tij për vota, edhe sa do ta hapë thesin e parave që ka mbledhur dhe nuk i investon.
