Në takimin elektoral në Elbasan, kryeministri Rama nuk ka harruar të përmndë edhe opozitën, specifikisht Monika Kryemadhin. Ai ka kujtuar ngjarjen me ballokumet, kur kryetarja e LSI futi në furrë 12 të tilla dhe nxorri vetëm 6. Rama ka thënë se PS nuk është si ata që xhirojnë goma, ndërsa u shpreh se të votosh për Monika Kryemadhin është si të ngresh nga varri gjithë Rilindasit. Kryeministri nuk harroi as presidentin Meta duke thënë se duhet ndihmuar që të kthehet në shtëpi pasi e kërkon e bija.
“Ne nuk jemi si ata që xhirojnë goma, si ata që fusin 12 dhe nxjerrin gjashtë ballokume. I vunë një njollë festës së shqiptarëve, futi 12 ballokume dhe nxori 6. Unë sot jam këtu dhe në këtë ndeshje ju kërkoj mbështetje për një mandat të tretë për Partinë Socialiste, jam këtu se jam i pakënaqur se gjërat që kemi bërë nuk janë ato që mund, duhet dhe bëjmë për Shqipërinë. Kalaja e Elbasanit është një nga magnetet më të fuqishme të turizmit, jo vetëm në Elbasan, por për të gjithë Shqipërinë. Nuk kemi sjellë njerëz nga Tirana për të marrë vota, qershinë mbi tortë e kemi marrë nga Kalaja, Evis Kushin. Duke votuar Evisin votojnë për fëmijët e tyre që s’kanë të drejtë vote, se nuk ua kanë borxh. PD është si aeroplan pa bisht, më tregoni 1 tullë që bëri për Elbasanin, apo një shkollë që ndërtoi…ma tregoni. Nuk votohen fosilet. Të votosh për Monika Kryemadhin është si të ngresh nga varri të gjithë Rilindasit. Metën duhet ta ndihmojmë të kthehet në shtëpi sepse e kërkon e bija,”- tha Rama.
