Gazetarja Erisa Zykaj, e cila punon nga Brukseli ka komentuar deklaratën e shefes Operacionit Ndërkombëtar të Monitorimit, Genoveva Ruiz Calavera, duke thënë se ajo nuk e ka tagrin për të caktuar data apo kushte për negociatat, pasi këtë e bëjnë vendet anëtare të BE-së.
Zykaj në një lidhje “Skype” me emisionin “Tempora”, u shpreh se BE ka ndryshuar metodologjinë, pasi duan reforma reale dhe jo vetëm në letër.
“Të gjitha do të donim që të mos kishim 15 kushte, por nuk është Calavera që vendos për kuadrin negociues dhe datat negociuese, por janë shtetet anëtare. Calavera do që të nxisë vendin tonë që të shkojë përpara. Nëse do të thoshte se do të kishte 15 kushte do të demoralizohej vendi ynë, ndryshe nga Maqedonia e Veriut që nuk ka asnjë kusht.
BE ka ndryshuar metodologjinë, pasi duan reforma reale dhe jo vetëm në letër. KiE ka dëshirë që vendi ynë të ecë përpara, por vendet anëtare thonë se janë 15 kushte. Pa këto kushte nuk do të merrej vendimi”, tha Zykaj.
Ndërkohë kryeministri Edi Rama ka reaguar ditën e sotme për seancën e mbajtur dje në Parlamentin Evropian ku u diskutua për Shqipërinë.
Në një reagim në mediat sociale, Rama se nuk ka 15 kushte për anëtarësimin e Shqipërisë në BE dhe shton se kush thotë se kushtet ekzistojnë ka thjesht qëllimin politik të luftës qorre me qeverinë. Kreu i qeverisë publikoi edhe një pjesë nga fjala e Genoveva Ruiz Cavalera, e cila ka folur në emër të Komisionit Evropian.
