Kryeministri Edi Rama, është i ftuar mbrëmjen e sotme në emisionin ‘Zonë e Lirë’ me Arian Çanin, ku ka folur sërish për refuzimin e dekretimit të Gent Cakajt në postin e ministrit të Jashtëm nga presidenti Ilir Meta, për të cilin thotë se ka shkuar shumë larg me veprimet e tij.
Për të argumentuar se vendimi i Metës për mos dekretimin e Cakjat është antikushtetues, ai solli precedentin e dekretimit të Xhafajt nga Nishani.
“Nishani ishte partiak, ishte i PD. Nishani doli në një konferencë, s’la fjalë pa thënë për Fatmir Xhafajn, të gjitha ato që e bëjnë opinionin e tij komplet të papajtueshëm me formën e tij, në fund Nishani tha me fjalë të thjeshta: Fatmir Xhafën nuk e shoh dot me sy, por Kushtetuta më detyron ta firmos. Presidenti duhet vetëm të firmosë”– tha Rama.
I pyetur se pse nuk e shkarkon presidentin, kreu i qeverisë tha se nuk i ka votat.
” Meta ka ndërmarrë një inkursion të përsëritur. E kam pasur zët kur kryeministri sulmon Presidentin dhe anasjelltas. Meta është angazhuar në një krim ndaj diturisë, kështu e konsideroj unë. Në një krim ndaj ndaj pastërtisë, ndaj një djali i cili mund të meritojë patjetër gjykime pozitive apo negative të opinionit publik, por jo njollosjen e qëllimshme që Meta dhe të tjerë tentojnë t’i bëjnë duke e përdorur si mish për top mes presidentit të Kosovës dhe kryeministrit të Shqipërisë.
Meta ka shkelur kushtetutën në mënyrë të përsëritur me rastin e Lleshajt, me kthimin e ligjeve që s’ka të drejtë ti kthejë. Sepse e ka humbur betejën politike. Është president për të garantuar Kushtetutën dhe unitetin kombëtar dhe pavarësinë e institucioneve e pushteteve. S’është aty për të dhënë mendime, mendimet e Metës për taksat s’më interesojnë fare. Le t’i mbajë për vete mendimet. S’duhet të shprehet fare çfarë mendon për taksat, është çështje e partive politike është çështje e qytetarëve.
Nishani meriton sot respekt për shkak të Metës se pavarësisht se u bë qesharak, ishte partiak, s’ka arritur aty ku ka arritur Meta që ka sfiduar rendin kushtetues”, tha Rama.
Çani: Pse nuk e shkarkon?
“Shkarkimi i presidentit kërkon 2/3 e kuvendit te Shqipërisë dhe kjo është logjika që përdor Meta, ‘mua s’më shkarkojnë dot dhe bëj çfarë të dua. Mund të bëjë ç’të dojë për turpin e presidentit të republikës që në momente të caktuara del nga shinat dhe sillet si kryetar i LSI” -u përgjigj Rama.
