Ndërsa u desh 1 vit që të publikoheshin, rezultatet e të dhënave të Censusit ishin surprizuese por jo transparente. Drejtoresha e INSTAT, Elsa Dhuli, ka deklaruar se sipas të dhënave të Censit rezulton se në Shqipëri jetojnë 2 milionë e 412 mijë e 113 banorë.
Ndërkohë ‘Albanian Policy Center’ ka publikuar sot një raport me të dhëna që rrëzon shifrat e INSTAT. Disa nga të dhënat shqetësuese më të rëndësishme që dolën gjatë punës kërkimore:
Janë 478,245 të larguar me dokumente të rregullta për në vendet e BE:
-191,670 persona nga viti 2014-2023 kanë kërkuar azil në vendet e BE-së
-311,650 individë qëndrojnë në mënyrë të paligjshme në vendet e BE-së
-12,301 shqiptarë të mbërritur në Mbretërinë e Bashkuar nëpërmjet anijeve të vogla vetëm në vitin 2022, sipas një raporti të vitit 2023 të Parlamentit Britanik. Në vitin 2020, një vit pandemie, 50 shqiptarë mbërritën me varka të vogla, ndërsa vitin pasardhës ishin 800.
Këto të dhëna nga institucionet ndërkombëtare tregojnë se në Shqipëri janë aktualisht më pak se 2 milionë banorë.
Por deri më tani, vetëm të dhënat e popullsisë janë bërë me dije, pasi ende pritet që të publikohen më shumë detaje nga “marrja në pyetje” e të gjithë qytetarëve të Republikës së Shqipërisë.
Censi i Popullsisë dhe Banesave 2023 nisi punën më 18 shtator dhe ishte parashikuar të zgjaste 6 javë, por që u shty deri më 15 nëntor pasi koha e caktuar fillmisht ishte e pamjaftueshme. Censi i Popullsisë dhe Banesave 2023 do të jetë Censi i 12-të, që kur Shqipëria u shpall shtet i pavarur në vitin 1912, ku Censi i parë u krye në vitin 1923. Që prej Censit të vitit 1989, metodologjia e tij ka ndjekur gjithnjë e më shumë rekomandimet ndërkombëtare për kryerjen e Censit.
