Kryeministri i vendit Edi Rama, ka dhënë këtë të mërkurë një intervistë për gazetaren e CNN, Biana Golodryga.
Kryeministri foli ndër të tjera për ardhjen e afganëve në vendin tonë dhe ka theksuar se duhet t’u jepnim strehë e besim në këtë moment krize. Ai ka thënë se 30 vite më parë kemi qenë ne afganët për vëllezërit tanë italianë. Ai ka thënë se nuk bëhet fjalë për besim apo ngjyra, bëhet fjalë për njerëz dhe se duhet t’iu japim atyre strehë në një moment krize të thellë.
“30 vite më parë kemi qenë ne afganët për vëllezërit tanë italianë, kështu që askush më mirë se ne e kupton situatën e tyre. Kur nuk je shumë i pasur, kujtimet janë shumë të pasura. Nuk bëhet fjalët për besim apo ngjyra, bëhet fjalë për njerëz, duhet t’iu japim strehë në një moment krize të thellë. Nuk mendoja për artin kur dola në rrugë për të kërkuar ndryshimin e regjimit. Si mund t’i lemë këta njerëz të vdesin? Si mund t’u mbyllim dyert atyre në një kohë si kjo, kur vendin e ka përpirë lufta?”
Ndër të tjera kryeministri Edi Rama ka bërë me dije se numri i afganëve që do të strehojë vendi ynë është rreth 4000.“2000 që janë listuar dhe 2000 të tjerë që ne po punojmë për t’i pritur. Do jenë rreth 4000 mijë”, tha Rama.
