Fakti që ekonomia botërore do kalojë një krizë të thellë dhe shume vende do pësojnë rënie të mëdha si pasojë e COVID-19, është tashmë i pashmangshëm.
E padyshim edhe vendi ynë do përballet me problematika të shumta, ndonëse sipas kryeministrit Rama për Shqipërinë do jetë më e lehtë ringritja sepse ekonomia është e vogël.
Teksa zbatimi i paketës së ndihmës financiare të marrë në kuadër të masave për të luftuar pandeminë ka filluar zbatimin, qeveria ka njoftuar zgjerimin e paketës.
Së fundmi, qeveria ka miratuar një Akt Normativ, i cili lejon bizneset e vogla që këtë vit të paguajnë me vonesë këstet tremujore të tatimit të thjeshtuar të fitimit, i cili parapaguhet në bazë të të dhënave fiskale të vitit të mëparshëm.
Bëhet me dije se këto pagesa për tremujorin e parë dhe të dytë të bëhen brenda datës 20 tetor 2020 ndërsa për tremujorin e tretë dhe të katërt, brenda datës 20 dhjetor 2020.
Kujtojmë se kjo kërkesë e biznesit, është refuzuar disa herë nga kryeministri Edi Rama, pasi e konsideronte si një kërkesë të papranueshme, por së fundmi ka vendosur ta pranojë, teksa vendimi pritet që të lehtësojë për pak kohë biznesin në këtë kohë pandemie.
Një ditë më parë, Banka Botërore publikoi një raport sipas së cilit Shqipëria pritet të humbasë 1,4 për qind të Prodhimit të Brendshëm Bruto.
Në raport thuhet se borxhi publik pritet të rritet mbi 70% të PBB në vitin 2020, teksa defiçti do të rritet në 3,9 për qind të PBB, si pasojë e të ardhurave të pakta për shkak të pandemisë dhe mbështetja financiare e dhënë për rindertimin pas tërmetit të 26 nëntorti të vitit të shkuar.
Gjithashtu, edhe varfëria pritet të rritet me 0.4 për qind, por gjithçka varet nga kohëzgjatja e masave kundër COVID-19, pasojat në punësim dhe në të ardhura.
Pandemia, BB: Shqipëria do të humbasë 1.4 % të GDP, do rritet varfëria dhe borxhi publik
