Pasi presidenti amerikan Donald Trump mori detyrën, autoritetet amerikane arrestuan më shumë se 530 emigrantë të paligjshëm dhe deportuan qindra prej tyre.
Zëdhënësja e Trumpit, Caroline Leavitt, njoftoi për këtë operacion në një postim në shërbimin online X, duke theksuar se ky ishte “dëbimi masiv më i madh në histori”. Sipas të dhënave, Shërbimi i Imigracionit kishte realizuar më shumë se 170.000 arrestime gjatë vitit 2023, një mesatare prej 467 në ditë.
Objektivi i Trumpit, i cili ishte shpallur gjatë fushatës zgjedhore, është zvogëlimi drastik i numrit të emigrantëve të paligjshëm në SHBA, të cilët janë rreth njëmbëdhjetë milionë.
Gjatë marrjes së detyrës, ai deklaroi se do të dëbonte “miliona emigrantë” dhe shpalli gjendjen e jashtëzakonshme në kufirin me Meksikën, duke dërguar trupat shtesë atje.
Po ashtu, Kongresi miratoi një projektligj për të zgjeruar paraburgimin e të huajve pa dokumente të vlefshme qëndrimi.
Në Meksikë, qeveria ka njoftuar ngritjen e dymbëdhjetë kampeve pritjeje për emigrantët që do të dëbohen nga SHBA.
Programi quhet “Meksika të përqafon” dhe përfshin kampe për qytetarët meksikanë dhe për qytetarët e tjerë.
Nga ana tjetër, Trumpi ka pësuar një humbje gjyqësore lidhur me planin e tij për të hequr shtetësinë amerikane të fëmijëve të lindur në SHBA nga emigrantët e paligjshëm.
Një gjykatës federal e ka bllokuar këtë urdhër ekzekutiv, duke e konsideruar atë si të papajtueshëm me Kushtetutën, pasi e drejta e shtetësisë për fëmijët e lindur në SHBA është garantuar nga Amendamenti i 14-të. Trumpi ka njoftuar se do të apelojë këtë vendim.
