Sërish çështja e vaksinimit në Shqipëri lë për të diskutuar. Nuk maftoi vetëm diferencimi me të moshuarit personalitete, por kësaj rradhe ndryshohet dhe mosha që u premtua fillimisht për vaksinim. Pas urdhrit nga ministria e Shëndetësisë se do të vijohet me vaksinimin e moshave mbi 80 vjeç, ndryshe veprohet nëpër qendra.
Kanë qenë të moshuarit në qytetin e Shkodrës që e kanë ngritur si shqetësim, pasi janë kthyer në shtëpitë e tyre të pavaksinuar. Për ata e gjitha është tallje, pasi ndryshe u tha dhe ndryshe po veprohet.
“Tre herë na kanë gënjyer deri më tani. S’dimë ku të qahemi dhe çfarë të bëjmë se ne jemi vetëm.”, shprehet një prej tyre.
Të pyetur për këtë ndryshim të fundit, zyrtarët në Shkodër ia faturojnë këtë kaos mjekëve të familjeve.
“E vërteta është që mjekët e familjes kanë bërë lajmërime më shumë se sa duhet te të moshuarit, ndërkohë që ka ardhur një udhëzim i ri që thotë se ne nuk mund të vaksinojmë për momentin ashtu siç është deklaruar në fillim.”, shprehen ata.
E njëjta situatë ka ndodhur dhe në Vlorë, ku shumë prej të moshuarave nuk e morën dozën e shumëpërfolur.
Duke iu referuar deklaratave të vetë kryeministrit Edi Rama, vaksinimi do të niste me të moshuarit personalitete mbi 80 vjeç dhe do të vijohej me të moshuarit e tjerë në çdo qytet të Shqipërisë.
“Ditën e dielë (21 shkurt) do të fillojmë me disa personalitete, 80 e lart që do të vaksinohen për të filluar me këtë kategori. Ndërkohë vazhdojmë përpjekjen për të siguruar sasi të konsidetueshme vaksinash në vijim. Brenda muajit mars do të kemi edhe 50 mijë dozat e Pfizer, ato të parat domethënë”, u shpreh Rama disa ditë më parë nga Vlora.
Pavarësisht kësaj, në qendrat e vaksinimit thirren për të marrë dozën vetëm ata që janë 90 vjeç, duke krijuar kështu pakënaqësi tek moshat e thyera, të cilët enden sporteleve pa marrë asnjë përgjigje konkrete.
