Rritja e pagave për administratën ka bërë që qeveria Rama të marrë një vendim i cili favorizon një prej organeve më të larta të qarkut, prefektin.
Pikërisht në mbledhjen e sotme qeveria ka vendosur rritjen e pagave për prefektët dhe këtë e ka firmosur vet zv/kryeministri, Erion Braçe. Braçe ka firmosur një vendim për “disa shtesa dhe ndryshime në vendimin nr.187, datë 8.3.2017, të Këshillit të Ministrave”. Pra bëhet fjalë për nivelet e pagave të administratës.
Gjatë vitit 2017 u botua në fletoren zyrtare struktura e pagave për punonjësit e institucioneve dhe u vendos që prefekti do të kishte një pagë prej 130 300 lekë.
Me vendimin e sotëm, pagat e tyre rriten me 23 mijë lekë dhe shkojnë në 153 300 lekë për të 12 prefektët e qarqeve. Po ashtu rritet paga e nënprefektëve, që kap shifrën e 123 000 lekë. Ndërkohë nuk ndryshon paga e zëvendësministrave, të cilët marrin 153 300 lekë.
