Qeveria jep pa tender 300 mijë metër katror sipërfaqe ndërtimi, ish-komandën e Ushtrisë dhe disa reparte. Me një vendim të firmosur nga zëvendëskryeministri Erion Braçe, është dhënë i gjithë territori kundrejt kontratës 1 euro me një afat 20 vjet.
Vendimi
Sipas aktit zyrtar të Këshillit të Ministrave autorizohet “Dhënia e miratimit për lidhjen e kontratës së qirasë me tarifën 1euro/kontrata, ndërmjet Ministrisë së Financave dhe Ekonomisë, si qiradhënës, dhe shoqërisë “Shijaku”, sh.p.k., si qiramarrës, për pasuritë shtetërore, me vendndodhje në fshatin Sauk, Tiranë, me sipërfaqe totale 27 000 m2, sipërfaqe ndërtimore 864.1 m2, me emërtimin “Vendkomanda Qendrore”, prona nr.186 me sipërfaqe totale 49 900.85 m2, sipërfaqe ndërtimore 545 m2, me emërtimin “Ish-reparti ushtarak nr.3042, Qendër Stërvitore”, prona nr.188, me sipërfaqe 25 881 m2, sipërfaqe ndërtimore 303 m2, me emërtimin “Bateri PZ” dhe prona nr.1300, me sipërfaqe 33 934.15 m2, sipërfaqe ndërtimore 226 m2, me emërtimin “Ish-reparti ushtarak nr.3042, Qendër Stërvitore”, me sipërfaqe të përgjithshme 136 716 m2 truall, në përgjegjësi administrimi të Ministrisë së Mbrojtjes dhe Ministrisë së Kulturës, për një periudhë 20 (njëzet) vjet, sipas genplanit dhe projektkontratës, që i bashkëlidhen këtij vendimi”.
Vendimi i datës 2 dhjetor nuk sqaron se për çfarë projekti bëhet fjalë, as se sa vetë do të punësohen aty. Zakonisht objekte të tilla janë marrë dhe janë ndërtuar pallate. Firma që i merr me qira ka si objekt materalet e ndërtimit dhe tregtinë.
Ligji
Kjo lloj kontrate e qirasë bëhet, sipas ligjit, kur ka një investim të rëndësishëm për vendin, që synon tërheqjen e industrive të reja dhe futjen e teknologjive të përparuara, me një nivel investimi mbi 800 000 000 (tetëqind milionë) lekë dhe që do të sigurojë jo më pak se 500 (pesëqind) vende pune. Po kështu ligji sanksionon të drejtën e privatizimit për subjektet që realizojnë investime në masën 150 për qind të vlerës së truallit apo 750 për qind në rastin kur situata është më komplekse.
/GazetaReforma.com/
