Erion Veliaj ka reaguar për vendimin e qeverisë që i kalon Bashkisë së Tiranës truallin e Teatrit Kombëtar. Nga Tokio ku ka shkuar për të ndjekur Lojërat Olimpike, Veliaj tha në një intervistë për News 24 se VKM-ja është korrektuar sipas vendimit të Gjykatës Kushtetuese. Ai ka thënë se vendimet nuk bien në kundërshti me njëra-tjetrën dhe se është vetëm trualli ai që i kalon në pronësi Bashkisë, jo teatri.
Veliaj nuk mund të rrinte pa bërë edhe një krahasim me Tokion, duke thënë se stadiumi atje nuk është më i madd apo më i bukur se “Air Albania”.
“Është reflektim i vendimit të Gjykatës Kushtetuese për ta bërë siç duhet VKM-në e Teatrit duke qenë se teatri i vjetër fizikisht nuk ekziston është vetëm trualli ai që kalon dhe jo trualli me një ndërtesë që tani nuk ekziston më. Është korrektuar sipas Gjykatës Kushtetuese kalimi i pronës tek Bashkia e Tiranës që na mundëson të vazhdojmë me procedurat për ndërtimin e Teatrit. Nuk bien ndesh me njëra-tjetrën vendimet e qeverisë me vendimin e Gjykatës Kushtetuese. Meqë jemi në Tokio ajo që kam kuptuar në vende të tilla është që kombet ecin përpara kur nuk bllokohen projektet e mëdha. Stadiumi këtu nuk është aq ndryshëm apo më i madh dhe më i bukur se Arena Kombëtare. Diferenca është që ne i bëjmë ndryshimet me shumë dhimbje. Stadiume si ky bëjmë dhe ne, e kemi bërë në Tiranë”, tha Veliaj.
