Prej 5 ditësh, lumi Gjanica që kalon përmes qytetit të Fierit e buzë pedonales, është kthyer në përrua të zi, për shkak se brenda tij, po derdh mbetjet hidrokarbure kompania “Terra-Oil” në pronësi të Shefqet Dizdarit, ortakut të ish-agjentit të FBI, Charles McGonigal e Agron Nezës.
Fakti që Gjanica vazhdon të jetë i zi, me prurje në formë baltovine mbetjesh nafte e mazuti dhe nuk po ndryshon ngjyrë, tregon se “trimat vrasës” të kompanisë “Terra Oil”, vazhdojnë të derdhin mbetjet në rrjedhën e tij.
Për shkak të erës së qelbur dhe ajrit mbytës e kanceroz të krijuar nga mbetjet ne lumë, qytetarët e Fierit kanë shmangur lëvizjet dhe kalimin e kohës së lirë në parkun e ndërtuar buzë Gjanicës.
Por nuk janë vënë në lëvizje, krye bashkiaku Armando Subashi, ministrja e Mjedisit, Mirela Kumbaro; ministrja e Shëndetësisë, Albana Koçiu dhe Policia e Shtetit; të cilët sipas ligjeve, kanë detyrim të ndërhyjnë menjëherë për ndalimin e këtij krimit, për ndëshkim me gjobë, pezullim aktiviteti të kompanisë “Terra-Oil”, detyrimin e saj të pastrojë gjatësinë e lumit dhe të prangosë pronarët.
Nuk po reagojnë e nuk veprojnë, sepse pronari i kompanisë që ka qelbur lumin Gjanica dhe po helmon banorët e Fierit, është Shefqet Dizdari, miku e pazarxhiu i kryeministrit Edi Rama dhe ortak i ish-agjentit të FBI, Charles Mcgonigal, që bashkë me Bablokun, futi oligarkun rus Oleg Deripaska në koncesionet shqiptare.
Më 22 tetor 2022, kur kryeministri Edi Rama shkoi në Fier, për të inspektuar punimet në shtratin e Gjanicës dhe shëtitores e parkut buzë tij, tha: – “Kush do kapet apo filmohet, duke hedhur qoftë edhe një mbeturinë në këtë shëtitore apo në rrjedhën e lumit, do përfundojë në burg sipas ligjit”.
Sipas ligjit “Për administrimin e mbetjeve hidrokarbure”, kompanitë që derdhin mbetjet në lumenj apo në mjedise publike tokësore, u hiqet licenca e koncesionit përgjithmonë, gjobiten me 10% të xhiros vjetore, arrestohen pronarët kur krimi konstatohet në flagrancë, dhe kompania detyrohet të rehabilitojë dëmin me shpenzimet e saj.
Por prej 5 ditësh, në rrjedhën e lumit Gjanica po derdh qindra tonelata mbetje hidrokarburesh, kompania “Terra-Oil” e Shefqet Dizdarit, mikut të Edi Ramës; ndaj të cilit, asnjë institucion mjedisi, shëndetësie, policie e drejtësie nuk po guxon të zbatojë ligjin, madje nuk guxojnë t’i përmendin emrin kësaj kompanie.
Po i bëjmë një pyetje edhe ortakut gjerman Peter Krempin të kompanisë “Terra-Oil”: – A do guxonit të derdhni mbetje hidrokarburesh, ose edhe mbeturina zyre e shtëpie në lumenjtë e Gjermanisë, siç po i derdhni në lumin Gjanica që kalon përmes qytetit të Fierit?/Pamfleti
