Edi Rama ka nxjerrë së fundmi edhe një “risi” tjetër digjitale, këtë herë me emrin “Hapësira ime publike”, duke e shitur si armën e re për mbrojtjen e hapësirave të përbashkëta, pas aksionit shkatërrues që ka ndërmarrë në Shqipëri në mes të sezonit veror. Në teori, qytetarët do të denoncojnë zaptimet, ndërtimet pa leje, parkimet private të paligjshme dhe ndotjen e hapësirës publike. Nëse institucionet nuk reagojnë brenda 24 orëve, ti plotëson një formular tjetër ankese. Në praktikë, kushdo që ka jetuar në Shqipërinë e Ramës e di se ky portal do të ketë të njëjtin fat si të gjithë paraardhësit e tij: shumë bujë, miliona euro të hedhura, zero rezultat. Historia e platformave të tij është manuali më i qartë i dështimit.
Njësoj edhe “Kryeinspektoriati Digjital i Territorit” , një tjetër tullumbace propagandistike që do të mbikëqyrte ndërtimet, taksat, pyjet, lumenjtë, që prezantua me pompozitet. E-Albania, që u shit si revolucion, është kthyer në ferr për qytetarët. Shërbime që nuk hapen, kërkesa që bllokohen dhe një rrjet i tërë “ndihmësish” privatë që, kundrejt pagesës, të nxjerrin një dokument publik. Ky është korrupsioni i institucionalizuar nën logon e “modernizimit”. Raportet e Kontrollit të Lartë të Shtetit e kanë thënë hapur: AKSHI, agjencia që kontrollon të gjitha këto sisteme, nuk regjistron as incidentet teknike, as zgjidhjet, as planin e centralizimit të sistemeve që u premtua që në 2017. Rezultati? Mbi 79 institucione ende jashtë menaxhimit, kaos total dhe siguri kibernetike të çarë, siç e treguan sulmet e 2022-shit.
Nuk është se mungojnë shembujt e tjerë të djegies së parave tona. “Komisariati Dixhital”, një aplikacion për denoncime në kohë reale, nuk funksionon. Satelitët “Albania 1” e “Albania 2” që supozohej të monitoronin territorin, sot janë zhdukur nga fjalori i qeverisë, pa asnjë raport konkret. Kështu u harruan edhe tabletat për shkollat, plot 3.5 milionë dollarë të djegura për mësimin online gjatë pandemisë. Sistemet e pasaportave dhe taksave të “centralizuara” ende të detyrojnë të vraposh nga një sportel te tjetri me dosje në dorë. Edhe platforma si SIBERAS, që duhej të menaxhonte fshatrat, është lënë të kalbet pa u përdorur nga bashkitë.
Këto projekte nuk ndërtohen për qytetarin, por për propagandën. Janë fasada digjitale të menduara për t’u treguar në Facebook, Instagram e Tik-Tok, jo për të funksionuar në realitet. Asnjë portal nuk zgjidh asgjë nëse IKMT nuk lëviz pa urdhër politik, nëse inspektoratet lokale mbyllin sytë për miqtë e pushtetit, nëse prokuroria nuk prek zaptuesit e mëdhenj. Denoncimet e qytetarëve do të shkojnë në të njëjtin vrimë të zezë ku kanë përfunduar gjithmonë: në asgjë.
“Hapësira ime publike” është prurja e re e një serie mashtrimesh teknologjike ku miliarda lekë janë hedhur për platforma që nuk bëjnë asgjë. Nga e-Albania te satelitët e harruar, nga tabletat e varrosura te aplikacionet fantazmë, bilanci është i njëjtë: qeveria dështon, qytetari paguan. Dhe në këtë vend, kjo është e vetmja platformë që funksionon gjithmonë!
