Mediat spanjolle kanë publikuar pamje dramatike nga vendi i aksidentit tragjik që i mori jetën futbollistit të Liverpool-it, Diogo Jota.
Ngjarja ndodhi në autostradën A-52, pranë qytetit Cernadilla, në veriperëndim të Spanjës, afër kufirit me Portugalinë.
Sipas raportimeve të para, dyshohet se gjatë një parakalimi, njëra prej gomave të Lamborghinit shpërtheu, duke bërë që makina superluksoze të humbiste kontrollin, të dilte nga rruga, të përmbysej dhe më pas të shpërthente në flakë.
Aksidenti ndodhi pak pas mesnate, rreth orës 00:30 të së enjtes.
Shërbimet e emergjencës mbërritën menjëherë në vendngjarje, por nuk mundën të shpëtonin jetën e dy vëllezërve që ndodheshin në mjet.
Pamjet tregojnë skenën e përmbysur dhe të djegur të makinës, ndërsa ekipet e shpëtimit dhe hetuesit janë të pranishëm duke analizuar shkaqet e ngjarjes.
Një video e siguruar nga mediat lokale tregon qartë momentet kur makina del nga rruga, si dhe gjurmët e gomave që tregojnë trajektoren e fundit të automjetit.
Barrierat mbrojtëse janë dëmtuar rëndë, ndërsa copëza të tyre janë shpërndarë në të dy anët e rrugës.
