Parlamenti Europian publikon sërish apelin e 3 eurodeputetëve për qeverinë shqiptare i cili u fshi një ditë më parë, duke zbutur qëndrimin e tij. Pasditen e së enjtes tre eurodeputetët, kryetari i Komisionit për Punë të Jashtme David McAllister, raportuesja për Shqipërinë Isabel Santos dhe kryetari i Delegacionit të Parlamentit për Shqipërinë Manolis Kefalogiannis shpreheshin se cdo ndryshim i marrëveshjes së 5 qershorit (pas nismës për hapjen e listave dhe koalicionet) pa konsensus me të gjitha partitë mund të rrezikojë konferencën e parë ndërqeveritare për negociatat e anëtarësimit.
Mirëpo, tashmë nga një deklaratë në formë ultimatumi se çdo modifikim i marrëveshjes së 5 qershorit pa konsensus mund të rrezikojë integrimin, qëndrimi i tyre merr një formë më të zbutur duke nënvizuar rëndësinë e marrëveshjes dhe konsensusin për integrimin.
Abcnews.al iu drejtua mëngjesin e sotëm Parlamentit Europian duke pyetur në lidhje me shkaqet që çuan në fshirjen e deklaratës mbrëmjen e djeshme dhe përse ajo u ribotua sot me disa ndryshime në tekst. Oficerja e Shtypit e Parlamentit Europian, Snjezana Kobescak tregoi se deklarata e publikuar dje në faqen e PE-së nuk ishte formati final i qendrimit të tre eurodeputetëve prandaj edhe u fshi.
Megjithatë, Kobescak thekson se qendrimi i eurodeputetëve mbetet i njejtë: Marrëveshja e 5 qershorit duhet të implementohet ashtu siç edhe u miratua.
“Arsyeja se përse qendrimi u publikua i korrigjuar lidhet me një gabim, pasi dje u publikua gabimisht në faqe versioni jo final i deklaratës. Mesazhi i deklaratës mbeti i njëjtë dhe është e qartë, marrëveshja e 5 qershorit për Reformën Zgjedhore duhet të zbatohet plotësisht”, theksohet në përgjigjen e Oficerës së Shtypit të PE-së, Snjezana Kobescak.
