Qytetarët e Tiranës, por jo vetëm, janë ankuar vazhdimisht në lidhje me faturat e “kripura” të ujit të pijshëm që vijnë nga UKT-ja dhe Bashkia.
Themi uji i pijshëm, por në fakt shumica e qytetarëve e blejnë ujin e pijshëm.
Gazeta “Atdheu”, ka publikuar një artikull, në të cilin shpjegohet sesi i shpenzon UKT paratë e grumbulluara nga qytetarët dhe përse qytetarëve u vijnë fatura kaq “të fryra”, sikur të kishin lavazh brenda në ambientet e shtëpisë.
Në dokumentin e publikuar, tregohet për një tender në shumën e 32.9 milionë lekëve (të vjetër), për blerje pajisjesh ‘GPS’ (për gjurmim) të automjeteve të UKT-së, që kjo e fundit e ka shpallur me procedurë të përshpejtuar dhe fare pa garë.
UKT-ja jo vetëm që e ka paracaktuar kompaninë që ka fituar këtë tender në datën 22 qershor, ose dy ditë më parë, por ka shtuar edhe vlerën totale përfundimtare të shpenzimeve nga 32.9 milionë që ishte fillimisht në 38 milionë lekë.
Sipas gazetës “Atdheu”, tenderi i është dhënë kompanisë “A-T-D Albania Technology Distribution” sh.p.k.
Këtu citohet se kjo kompani është e afërt me mikun e kryebashkiakut Erion Veliaj, ish-drejtorit të “NPR-Tiranë”, Blendi Gonxhe, sot drejtori i Përgjithshëm i DPSHTRR-së.
Në këtë dokument citohet se Gonxhe është përfitues i një mori tenderësh nga Bashkia e Tiranës, duke nisur që nga mirëmbajtja e automjeteve të bashkisë, blerja e automjeteve të reja, dhënie me qira automjetesh, apo shërbime të tjera, t cilat i siguron kundrejt tenderëve të drejtë për drejtë, nga kompanitë private që ka nën administrim.
Referuar tenderit më të fundit të UKT-së, lloji i procedurës që është formuluar ke qenë “Kërkese për Propozime-Shërbime” dhe objekti i kontratës kuadër ishte për “Shërbim GPS automjetesh”, me numër reference të procedurës “REF-56228-04-15-2020”, dhe me fond limit shumën prej: 3.298.200 (tre milionë e dyqind e nëntëdhjetë e tetë mijë e dyqind) lekësh pa tvsh.
Por pasi kontrata u lidh vetëm dy ditë më parë, shuma u ndryshua duke u rritur pak dhe shkoi në vlerën totale përfundimtare të kontratës (duke përfshirë lotet, opsionet dhe nenkontraktimin), në 3.808.800 lekë.
Ishte pikërisht kompania “A-T-D Albania Technology Distribution” sh.p.k., e cila e përfitoi këtë tender pa garë dhe pa kompani rivale në tenderim në datën 22.06.2020.
Kjo kompani, pra “A-T-D Albania Technology Distribution” ka si adresë rrugën “Pjetër Bogdani” (Nr.10, Kati 3, Apartamenti 10) në Tiranë, dhe numër të NIPT-it, “L21811033B”.
