Anëtarët e Opozitës në Komisionin Hetimor për Koncesionet në Shëndetësi kanë reaguar, pasi mazhoranca, pa konsensus ka miratuar planin e punës dhe kërkesat për informacion.
Në reagim, anëtarët e opozitës thonë se “vijimi i mbledhjes së komisionit hetimor për koncesionet në shëndetësi është një veprim i paligjshëm. Ky është një uzurpim i dhunshëm dhe një shkelje arrogante e ligjit për komisionet hetimore e padëgjuar në 33 vite të Kuvendit të Shqipërisë!”.
Anëtarët e opozitës deklarojnë gjithashtu se akti i sotëm “rikonfirmon mungesën e plotë të vullnetit të Edi Ramës për të lejuar hetimin nga parlamentit të dy prej akteve më të rënda korruptive të qeverisjes së tij si dhe mbrojtjes politike që ai dhe deputetët në mënyrë të verbër i japin korrupsionit dhe grabitjes shtetërore më të pashembullt të pluralizmit”.
REAGIMI:
Vijimi i mbledhjes së komisionit hetimor për koncesionet në shëndetësi është një veprim i paligjshëm! Ky është një uzurpim i dhunshëm dhe një shkelje arrogante e ligjit për Komisionet Hetimore e padegjuar në 33 vite të Kuvendit të Shqiperise!
Kryetarja e Komisionit, znj. Albana Vokshi, në zbatim të Rregullores së Kuvendit e mbylli mbledhjen, e detyruar pas bojkotit te hapur dhe publik të deputetëve të PS me skenarin e tyre të paramenduar për të bllokuar me çdo kusht miratimin e kërkesave për informacion pra bllokimin e hetimit të aferës së Koncesioneve të Sterilizimit dhe Check-up.
Mbledhja e vazhduar nga PS, pas mbylljes së saj nga Kryetarja e Komisionit, është e paligjshme, është një vetgjyqësi politike mafioze dhe vendimet e saj janë të pavlefshme pra nul. Edhe plani hetimor i njëanshëm i votuar nga kjo vetëgjyqësi politike është i paligjshëm dhe me zero vlere ligjore.
Akti i sotëm rikonfirmon mungesën e plotë të vullnetit të Edi Ramës për të lejuar hetimin nga parlamentit të dy prej akteve më të rënda korruptive të qeverisjes së tij si dhe mbrojtjes politike që ai dhe deputetët në mënyrë të verbër i japin korrupsionit dhe grabitjes shtetërore më të pashembullt të pluralizmit.
Opozita me konseguencë dhe vendosmëri të palëkundur do të bëjë transparencë të plotë dhe deri në fund për këto afera korruptive, për të cilat as SPAK nuk ka guximin të thotë të vërtetën. Se 200 milionë euro aferë janë firmosur me dijeninë dhe vullnetin e Edi Ramës!
Çdo shkelje ligji do të denoncohet deri në një për të evidentuar para cdo shqiptari inkriminimi dhe aleancën kriminale rilindase Qeveri Kuvend në mbrojtjen e korrupsionit.
