Në protesta një rol të rëndësishëm ka edhe Policia e Shtetit, e cila ruan rendin.
Nga studio e “A Show”, Ardi Veliu, Drejtori i Përgjithshëm i Policisë së Shtetit ka thënë se detyra e policisë në këto tubime është garantimi i mbarëvajtjes së saj. Mirëpo një pikë e nxehtë e prekur gjithmonë prej opozitës kanë qenë kontrollet e ushtruara nga efektivët blu dhe sa i përket kësaj çështjeje Veliu ka thënë se kjo bëhet për të pasur nën kontroll elementet kriminalë, të cilët shfrytëzojnë situatën për të kryer akte të ndryshme.
“Këto pika kontrolli ngrihen, sepse edhe elementi kriminal lëvizin dhe kërkojnë që të vijën në Tiranës dhe në kemi detyrimin që të garantojmë sigurinë e protestës. E drejta e protestës është themelore. Protesta ishte e paligjshme, sepse nuk ishte dhënë vendimi nga Policia e Shtetit për të garantuar rendin. Brenda tre orësh, organizatori në gjykimin e tij duhet që në policinë lokale do të mbajë këtë protestë në këtë vend dhe më këtë objekt. Detyra e Policisë është që të garantojë mbarëvajtjen e protestës”, tha Veliu.
Mirëpo duke qenë në vazhdën e protestave, Drejtori i Përgjithshëm i Policisë është pyetur edhe për banorët e Astirit, protestën e të cilëve e ka quajtur të paligjshme. Për më tepër, Veliu ka thënë se me këtë protestë Policia është treguar shumë tolerante dhe e durueshme.
“Protesta e Astirit, pavarësisht se ata mendojnë për atë nëse kanë ose jo të drejtë, por veprimi që ndërmerret duke bllokuar rrugën është veprim i kundraligjshëm. Mund të protestojnë në trotuar, por pa cenuar aktivitetin e pjesës tjetër të qytetarëve. Policia e Shteti është treguar tolerante duke mos përmbushur detyrimin e saj. Detyra jonë është të garantojmë rend dhe sigurinë e jetës së qytetarëve”, theksoi Veliu.
