Policia njofton se, prej orës 09:30 e në vijim, do të ketë bllokim të përkohshëm të qarkullimit të mjeteve në bulevardin kryesor pranë Bashkisë së Tiranës. Për këtë arsye, sugjerohet që të përdoren rrugë alternative, si Unaza e Mesme dhe Unaza e Madhe, deri në përfundim të tubimit.
Policia e Shtetit ka marrë masa organizative dhe operacionale për garantimin e rendit publik dhe sigurisë gjatë tubimit të organizuar nga “Aleanca për Mbrojtjen e Teatrit”, i cili do të mbahet më datë 10 qershor 2024, në orën 10:00, pranë Bashkisë së Tiranës.
Gjatë tubimeve të mëparshme të zhvilluara nga e njëjta aleancë, janë evidentuar raste të kundërshtimit të forcave të policisë dhe përdorimit të molotovëve e sendeve të tjera, duke rrezikuar jetën dhe shëndetin e punonjësve të policisë dhe pjesëmarrësve në tubime.
Policia bën thirrje organizatorëve dhe pjesëmarrësve të respektojnë ligjin dhe të distancohen nga çdo akt dhune, duke garantuar të drejtën për të organizuar dhe marrë pjesë në tubime paqësore.
