Pas protestës së maturantëve ditën e sotme, ka ardhur edhe reagimi i Qendrës së Shërbimeve Arsimore që shprehet se provimi është mbështetur tërësisht mbi programin e reduktuar.
Në lidhje me pretendimin e ngritur për “pyetje jashtë programit”, QSHA nënvizon se nuk ka patur asnjë pyetje jashtë këtij programi, teksa fton nxënësit të dërgojnë ankesat konkrete për pyetjet që mendojnë se janë jashtë këtij programi në mënyrë që të adresohen duke i hequr nga vlerësimi.
Më tej, shtohet se në përfundim të marrjes së rezultateve, QSHA do të shikojë kurbën e shpërndarjes së pikëve dhe bazuar mbi këtë kurbë, nëse do të vihet re zhvendosje të saj do të shikohet mundësia e ri-shpërndarjes së peshave të pikëve në test
Nga ana tjetër, informon se dy provimet e ardhshme të Maturës Shtetërore do të jenë me kohëzgjatje 2.5 orë dhe me alternativa, nga 2 orë që ishin parashikuar në fillim.
Ditën e sotme qindra maturantë protestuan pranë Ministrisë së Arsimit pas provimit të maturës në lëndën “Letërsi dhe Gjuhë Shqipe”, që u zhvillua ditën e djeshme.
Ata janë shprehur se testimi ishte mbi nivelin mesatar dhe jo i mirorganizuar dhe kërkojnë që Ministria të ndryshojë mënyrën e vlerësimit, pasi në të kundërt do bojkotojnë dy provimet e ardhshme.
Mirëpo, në një reagim të bërë pasditen e sotme Besa Shahini u shpreh se e ka ndjekur me keqardhje protestën, por shton se nuk beson se të ketë ndodhur ndokund tjetër që nxënësit të protestojnë për “provimet e vështira”.
Ministrja deklaroi se provimet kombëtare hartohen nga ekspertë provimesh dhe ajo i beson Qendrës së Shërbimeve Arsimore, institucion i cili ka thënë se këtë vit provimet ishin më të lehta se kurdoherë më parë.
REAGIMI I PLOTË
Qendra e Shërbimeve Arsimore njofton se Testi i Maturës Shtetërore 2020 është mbështetur tërësisht mbi programin e reduktuar. Në lidhje me pretendimin e ngritur për “pyetje jashtë programit”, nënvizojmë se NUK KA ASNJË PYETJE jashtë këtij programi. Në këtë kuadër, ftohen nxënësit të sjellin pranë QSHA ankesat konkrete për pyetjet që mendojnë se janë jashtë këtij programi në mënyrë që të adresohen duke i hequr nga vlerësimi. Në lidhje me cut-off-in, në përfundim të marrjes së rezultateve, QSHA do të shikojë kurbën e shpërndarjes së pikëve. Bazuar mbi këtë kurbë, nëse do të vihet re zhvendosje të saj (në rast se ka pasur ndonjë grup pyetjesh me një shkallë më të lartë vështirësie), atëherë do të shikohet mundësia e ri-shpërndarjes së peshave të pikëve në test. I gjithë ky proces do të analizohet profesionalisht dhe në mënyrë të kujdesshme nga specialistët e fushës në mënyrë që të bëhet më e mira për maturantët. Njëkohësisht, duam të shprehim se testi nuk ka asnjë gabim shkencor dhe mënyra se si hartohet përjashton çdo mundësi që të ketë gabime – qoftë në përmbajtje dhe qoftë në përfshirjen e koncepteve jashtë programit. Për sa i përket dy (2) testeve të ardhshme të Maturës Shtetërore, bëjmë me dije se ata do të jenë me kohëzgjatje 2.5 orë dhe me alternativa, paçka se edhe kohëzgjatja prej 2 orësh e parashikuar në fillim është më se e mjaftueshme në zhvillimin e provimit.
