Kryetari i Partisë Demokratike, Sali Berisha, ka paralajmëruar paralizimin total të Tiranës në protestën e planifikuar për datën 23 dhjetor.
Gjatë mbledhjes së Këshillit Kombëtar të PD-së, Berisha deklaroi se protesta, e cila do të zhvillohet në orën 17:00, do të jetë një akt mosbindjeje civile i paprecedentë në kryeqytet.
Sipas tij, kjo do të jetë forma më e fuqishme e rezistencës qytetare që Tirana ka përjetuar ndonjëherë.
“Në 23 dhjetor ora 17:00 kemi mosbindjen civile më të fuqishmen që ka parë Tirana ndonjëherë. Mbarë Bota mezi e pret këtë mosbindje civile. E kanë mirëpritur kudo në Botë. Ne i jemi mirënjohës mediave ndërkombëtare që kanë pasqyruar protestat tona. Ka gazetarë që kanë humbur vende pune ose janë kërcënuar me humbjen e vendeve të punës për shkrimet që kanë bërë.
Mirënjohja jonë është e pakufishme ndaj tyre. Mediat e Botës i paraqesin me pasion protestat tona, sepse janë anti-diktaturë, janë për liri”, deklaroi Berisha.
Më tej kreu i PD-së, zbuloi edhe një nga planet e protestës, duke theksuar se planifikon që të bllokojë qarkullimin jo më vetëm në qendër të qytetit, por edhe më gjerë.
“Nga Qafë Priska deri në Vorë duhet ta bllokojmë Tiranën në të gjitha drejtimet. Jam i bindur se ju do të mobilizoni të gjitha potencialet që keni në këtë mosbindje civile”, tha Berisha
