Propozimi i Grupit Parlamentar të Partisë Demokratike për një ndryshim në Rregulloren e Kuvendit të Shqipërisë synon që çdo deputet të vetëdeklarojë nëse ka përdorur aplikacionet e enkriptuara “SKY ECC” dhe “ENCROCHAT”.
Kjo iniciativë vjen si pasojë e zbulimeve nga SPAK, në bashkëpunim me agjensitë ligjzbatuese evropiane, ku është konstatuar se aplikacionet e përmendura janë përdorur gjerësisht në gjuhën shqipe, me rreth 16 mijë përdorues shqiptarë.
Sipas hetimeve, këto aplikacione janë përdorur jo vetëm nga anëtarë të grupeve kriminale, por edhe nga funksionarë të lartë në polici, drejtësi, dhe në strukturat qeverisëse.
Janë zbuluar komunikime mes një deputeti të Partisë Socialiste dhe eksponentëve të krimit të organizuar, ku përmendet edhe ndikimi i këtyre eksponentëve për pozicionin e deputetit në listat e kandidatëve dhe për sigurimin e votave në bashkitë Durrës dhe Shijak.
Po ashtu, deputeti i përfshirë dyshohet se ka ndihmuar eksponentët e krimit duke ndërhyrë në organet e drejtësisë.
Partia Demokratike argumenton se ky rast i zbuluar, së bashku me dyshimet e tjera të ngjashme të raportuara nga media, ngre pikëpyetje për integritetin e deputetëve dhe të Kuvendit në përgjithësi.
Përdorimi i këtyre aplikacioneve, të njohura për lidhjet e tyre me aktivitete kriminale, shihet si një rrezik për besueshmërinë e institucioneve.
