Prokuroria e Tiranës ka njoftuar se ka sekuestruar një sërë pasurish të një shtetasi, i cili ka ndërruar jetë në vitin 2022, për shkak se dyshohet se ato rrjedhin nga veprimtari kriminale.
Bëhet fjalë për shtetasin Sokrat Cari, i dënuar për disa vepra penale, përfshirë “Moskallëzim të krimit”, “Falsifikim të dokumenteve” dhe “Prodhim dhe shitje të lëndëve narkotike”.
Sipas hetimeve të Prokurorisë, Cari dhe familjarët e tij nuk kanë pasur burime të ligjshme financiare për krijimin e pasurive që zotëronin deri në vitin 2005. Kjo ka ngritur dyshime të forta se këto pasuri janë vënë si rezultat i veprimtarisë kriminale.
Në vitin 2007, Cari u shpall fajtor për “Falsifikim të dokumenteve”, ndërsa në vitin 2011 ai u dënua për “Prodhim dhe shitje të lëndëve narkotike” dhe “Moskallëzim krimi”.
Pasuritë e sekuestruara:
1. Godinë banimi dhe shërbimi: Një ndërtesë trekatëshe me papafingo në rrugën “Besim Imami”, vila nr. 34, me sipërfaqe totale ndërtimi prej 156.2 m² dhe sipërfaqe të përgjithshme prej 388.6 m².
2. Njësi tregtare: Një hapësirë në katin përdhes në rrugën “Zhan D’Ark”, godina 10, me sipërfaqe prej 95.1 m².
3. Automjet kamionçinë : I blerë sipas deklaratës doganore më 21 mars 2005.
Procedimi pasuror është zhvilluar në bazë të ligjit nr. 10192, datë 03.12.2009, “Për parandalimin dhe goditjen e krimit të organizuar, trafikimit dhe korrupsionit nëpërmjet masave parandaluese kundër pasurisë”, të ndryshuar. Prokuroria ka vlerësuar se këto pasuri janë fituar nga aktiviteti kriminal i shtetasit Sokrat Cari.
Gjykata e Shkallës së Parë të Juridiksionit të Përgjithshëm, Tiranë, ka pranuar kërkesën e Prokurorisë për sekuestrimin e pasurive, ndërkohë që hetimet për burimet financiare dhe veprimtarinë kriminale vijojnë.
