Prokuroria e Tiranës ka hapur hetime për mishin e pulës të importuar nga Brazili, i cili rezultoi i infektuar me salmonelë.
Hetimet po zhvillohen për dy vepra penale: “Shpërdorim detyre” dhe “Importimi, shitja dhe ruajtja e ushqimeve të rrezikshme për shëndetin e njerëzve”.
Fokusi i hetimeve është mbi procedurat e ndjekura nga punonjësit e Autoritetit Kombëtar të Ushqimit (AKU), duke shqyrtuar mënyrën se si është lejuar hyrja e këtij mishi në Shqipëri dhe vonesat në daljen e rezultateve të analizave.
Duheshin të paktën 10 ditë për të konfirmuar praninë e salmonelës, ndërkohë që një pjesë e mishit tashmë ishte hedhur në treg dhe nuk u arrit të tërhiqej plotësisht nga agjentët e AKU.
Hetimet u iniciuan pas referimit të rastit nga Policia e Shtetit, e cila ka shpallur në kërkim pronarin e kompanisë importuese. Gjithashtu, AKU ka kallëzuar disa nga punonjësit e saj për shpërdorim detyre.
Më 21 mars, analizat e AKU-së konfirmuan praninë e salmonelës në një sasi prej 7.8 tonë mish pule të importuar nga Brazili. Nga kjo sasi, AKU arriti të sekuestronte 5.2 ton, por 2.6 ton të tjera tashmë ishin shpërndarë në tregun shqiptar dhe dyshohet se janë konsumuar.
