Hetimet për rastin e vetëvrasjes së Irsa Muçollarit hedhin poshtë teorinë fillestare mbi shkaqet e tragjedisë. Prokuroria mohon ekzistencën e letrës së lamtumirës dhe vazhdon hetimet me mbi 30 persona të intervistuar.
Prokuroria e Gjirokastrës ka përjashtuar pistën e bullizmit si shkak për vetëvrasjen e 17-vjeçares Irsa Muçollari, e cila u gjet e pajetë më 10 shkurt. Sipas burimeve nga organi i akuzës, në kundërshtim me supozimet e para, nuk është gjetur asnjë letër lamtumire e shkruar nga adoleshentja.
Dokumenti i gjetur mes sendeve personale të Irsës rezulton të jetë thjesht një detyrë shkollore e lëndës së anglishtes, të cilën vajza e kishte shkruar gjatë viteve të arsimit 9-vjeçar. Ky zbulim ka orientuar hetuesit drejt kërkimit të motiveve të tjera që mund të kenë shtyrë 17-vjeçaren drejt aktit fatal.
Deri tani janë marrë në pyetje më shumë se 30 persona, duke përfshirë familjarët, të afërmit, psikologët dhe nxënësit e shkollës “Siri Shapllo”, ku Irsa ndiqte studimet e mesme. Nga hetimet kanë dalë edhe disa fragmente nga orët mësimore, ku raportohet se 17-vjeçarja mbante vazhdimisht telefonin celular mbi bankë.
Dëshmitë tregojnë se mësuesja i kishte kërkuar disa herë të hiqte telefonin, por vajza kishte kundërshtuar – një sjellje që bie në kontraditë me përshkrimin e familjarëve për natyrën e qetë të adoleshentes. Kjo mospërputhje ka shtuar pyetjet rreth gjendjes së saj emocionale në periudhën para ngjarjes tragjike.
Aktualisht, hetuesit janë në pritje të rezultateve nga zbërthimi i telefonit celular të Irsës, me shpresën se përmbajtja e tij do të ofrojë të dhëna të vlefshme për të kuptuar arsyet e vërteta që e shtynë vajzën drejt vetëflijimit.
