Flamur Sula, babai i Ilaria Sulës, vajza shqiptare e cila u vra brutalisht në Romë nga ish-i dashuri i saj, Mark Antony Samson vijon të kërkojë drejtësi nga autoritetet italiane, pas zhvillimeve të fundit në hetim.
Reagimi i tij erdhi pas njoftimit se Prokuroria e Romës ka kërkuar një gjykim të menjëhershëm për 23-vjeçarin filipinas, i akuzuar për vrasjen e vajzës së tij dhe fshehjen e trupit.
“Ata njerëz e lënduan shumë familjen time,” u shpreh Flamur Sula. “Ilaria kishte një jetë të tërë përpara dhe nuk është e drejtë që princesha ime pati këtë fund të tmerrshëm. Kam besim në sistemin italian të drejtësisë.”
Si ndodhi ngjarja
Ilaria Sula u shpall e zhdukur më 25 mars, pasi nuk ishte kthyer në banesën që ndante me tre shoqe të saj në Romë. Fillimisht dyshohej se largimi kishte lidhje me ndarjen nga i dashuri, por pas disa ditësh u zbuluan detaje tronditëse.
Trupi i pajetë i 22-vjeçares shqiptare, studente në Universitetin “La Sapienza”, u gjet brenda një valixheje në fund të një shkëmbi në një zonë pyjore në Poli, në periferi të Romës.
Sipas hetimeve, autori dyshohet se e ka vrarë Ilarian me thikë në një apartament në Romë, më pas ka futur trupin e saj në një valixhe dhe e ka transportuar në një zonë të largët për ta fshehur.
Detajet që kanë ndihmuar hetuesit për të zbardhur krimin përfshijnë përdorimin e telefonit të viktimës nga autori, i cili pas vrasjes ka vazhduar të dërgojë mesazhe dhe të bëjë postime në rrjetet sociale në emër të saj, me qëllim për të krijuar alibinë se ajo ishte ende gjallë. Telefoni i saj u gjet më pas i hedhur në një pusetë.
Analiza e tabulateve telefonike dhe ndjekja e sinjaleve celulare ndihmuan policinë të zbardhë lëvizjet e autorit dhe të sigurojë prova që çuan në arrestimin e tij.
Mark Antony Samson është tashmë përballë drejtësisë italiane, ndërsa familja e Ilaria Sulës kërkon me ngulm që përgjegjësi të marrë dënimin maksimal për krimin e rëndë që i mori jetën një vajze të re me gjithë jetën përpara.
