Gjatë mbërritjes së avionit presidencial francez në Vietnam, u regjistrua një moment i pazakontë ku duket se presidenti Emmanuel Macron është prekur në fytyrë nga gruaja e tij, Brigitte Macron.
Videoja u përhap shpejt në rrjetet sociale, duke nxitur spekulime dhe komente të shumta. Në imazhe, teksa dera e avionit hapet dhe Macron del jashtë, dora e Brigitte-s shtrihet drejt fytyrës së tij, duke krijuar përshtypjen e një shuplake apo përkëdheljeje, ndërsa reagimi i presidentit tërheq vëmendjen për shkak të shprehjes së tij të habitur.
Pallati Elize reagoi duke minimizuar ngjarjen, duke e cilësuar si një moment relaksi mes çiftit dhe jo si një konflikt serioz. Një zyrtar i afërt me presidentin e përshkroi episodin si një “mosmarrëveshje të vogël” që ndodh ndonjëherë para udhëtimeve zyrtare.
Në videon pasuese, Macron dhe Brigitte vijojnë rrugën së bashku, me Macron që i ofron krahun, ndërsa Brigitte mban dorën pak më larg, një gjest që ndryshon nga zakonshmëria e tyre e mëparshme.
Ky moment ka ngjallur interes të madh në media dhe në publik, duke nxitur diskutime për marrëdhënien e çiftit presidencial në sy të opinionit publik.
