Gjykata e Tiranës ka dënuar me dy vite burg Ermes Hoxhallin, i cili premtonte bursa studimi falas dhe udhëtime në Shtetet e Bashkuara, duke mashtruar zyrtarë të Ministrisë së Arsimit përmes falsifikimit.
Hoxhalli u dënua për falsifikim dokumentash dhe falsifikim kompjuterik, ndërsa përfitoi një zbritje prej 1/3 të dënimit për shkak të gjykimit të shkurtuar, duke i rezultuar një dënim final prej 1 viti e 4 muajsh burg.
Ai kishte krijuar një identitet të rremë si “Klea Rama”, duke pretenduar se ishte mbesa e kryeministrit Edi Rama dhe një diplomate e lartë në Ambasadën e SHBA-së. Në këtë mënyrë, ai prezantohej si udhëheqës i një projekti për të rinjtë dhe kishte falsifikuar dokumente si certifikata, vulat, firma dhe materiale të tjera për të manipuluar zyrtarë të Ministrisë së Arsimit dhe për t’i premtuar atyre mbështetje financiare për studime në SHBA.
Në hetimet e zhvilluara, Prokuroria e Tiranës sekuestroi një sërë dokumentesh të falsifikuara, përfshirë certifikatat dhe materiale të tjera, që u gjetën në laptopin dhe telefonët celularë të Hoxhallit.
Gjithashtu, u zbuluan emailet e përdorura për të komunikuar me zyrtarët, duke përdorur adresën “[email protected]”. Ky mashtrim u zbulua pas një alarmi të ngritur nga shërbimet e Ambasadës Amerikane.
Vendimi i gjykatës:
1. Deklarimin fajtor të të pandehurit E. H. për kryerjen e veprës penale “Falsifikimi i dokumenteve”, parashikuar nga neni 186/2 i Kodit Penal dhe në bazë të kësaj dispozite dënimin e tij me 1 (një) vit burgim.
2. Deklarimin fajtor të të pandehurit E. H për kryerjen e veprës penale “Falsifikimi kompjuterik”, parashikuar nga neni 186/a/1 i Kodit Penal dhe në bazë të kësaj dispozite dënimin e tij me 1 (një) vit burgim.
3. Në aplikim të nenit 55 të Kodit Penal, në bashkim të dënimeve të mësipërme, i pandehuri E. H. dënohet me një dënim të vetëm prej 2 (dy) vjet burgim.
4. Në aplikim të nenit 406 të K.Pr.Penale, i ulet 1/3 (një e treta) e dënimit dhe përfundimisht i pandehuri E. H. dënohet me 1 (një) vit e 4 (katër) muaj burgim.
5. Në zbatim të nenit 190 të K.Pr.Penale, provat materiale të sekuestruara, aparatet celularë dhe një laptop t’i kthehen të pandehurit.
6. Shpenzimet në fazën e hetimeve paraprake si dhe shpenzimet gjyqësore në ngarkim të të pandehurit.
7. Kundër këtij vendimi mund të bëhet ankim në Gjykatën e Apelit të Juridiksionit të Përgjithshëm, brenda 15 ditëve duke filluar ky afat nga dita e nesërme e njoftimit të vendimit.
U shpall në Tiranë sot më dt.27.01.2025.
