Kabinat pa leje në zonën turistike të Thethit, të cilat ndezën përplasjen mes kryeministrit Edi Rama dhe prokurores së Shkodrës Elsa Gjeli, rezultojnë të jenë në pronësi të një personazhi të shumëkërkuar nga drejtësia, Prekë Kodra.
Ky emër nuk është i panjohur për autoritetet. Në vitin 2021, një dokument i Njësisë Kundër Terrorizmit në Kosovë e rendiste Kodrën si personin që kishte planifikuar atentatin me snajper ndaj kryeministrit të Kosovës, Albin Kurti.
Plani u zbulua përmes një e-maili konfidencial të dërguar nga ish-drejtori i Policisë së Shtetit, Gledis Nano, në shtator të vitit 2022.
Prekë Kodra është aktualisht në kërkim ndërkombëtar, pasi është një nga të dyshuarit kryesorë në dosjen “Metamorfoza” të SPAK, që ka në shënjestër një organizatë kriminale me shtrirje ndërkombëtare dhe lidhje me struktura të drejtësisë, policisë dhe botës së biznesit.
Emri i tij del në përgjimet e komunikimeve të platformës së koduar Sky ECC, ku përmendet në lidhje me grupin kriminal “Bajri”, biznesmenin Pëllumb Gjoka, ish-zyrtarin e lartë të policisë Oltion Bistri dhe prokurorin Xhevahir Lita.
Ndër akuzat më të rënda që rëndojnë mbi të, është përfshirja në atentatin ndaj Ardian Çapjas në vitin 2020, ku u përdor një snajper nga një distancë e madhe në kodrën e Krastës.
Çapja ndodhej në oborrin e shtëpisë së tij në Elbasan, në një zonë të pajisur me kamera sigurie, por pavarësisht kësaj sulmuesi arriti të veprojë pa u identifikuar menjëherë.
Po ashtu, Kodra është i dyshuar edhe për vrasjen e Kastriot Reçit më 7 janar 2020, dhe për atentate të tjera të mbetura të pazbardhura.
Në përgjimet e SPAK, ai shfaqet në komunikim edhe me Suel Çelën (Marjus Lulajn), ku ky i fundit e paralajmëron që të mos ketë besim tek grupi “Bajri”, duke treguar përçarjet brenda botës së krimit të organizuar.
Prekë Kodra ka qenë i shpallur në kërkim edhe më herët, në vitin 2016, kur policia i gjeti në banesë dy armë gjahu dhe 90 fishekë. Sipas të dhënave zyrtare, ai jetonte në Shkodër, ndërsa aktivitetin kriminal e shtrinte në Tropojë, Ferizaj dhe Deçan të Kosovës. Ka qenë nën hetim për vrasje me paramendim dhe mbajtje pa leje të armëve të zjarrit dhe konsiderohet si person me rrezikshmëri të lartë.
